Komandante Polísia Nasionál Timor-Leste (PNTL) Munisípiu Viqueque, Superintendente Sebastião Alves Quintão. Imajen Tatoli/Vitorino Lopes da Costa

VIQUEQUE, 04 dezembru 2021 (TATOLI) – Komadante PNTL Munisípiu Viqueque, Superitendente Sebastião Alves Quintão, informa, festa Natál no simu tinan foun komunidade husi munisípiu Viqueque tenke kria pás no estabilidade.

“Ita atu tama ba Natál no simu tinan foun sidadaun sira iha munisípiu Viqueque, tenke kria pás. Tanba ema hotu hakarak halo ninia pasa iha liberdade hodi vizita família no PNTL munisípiu Viqueque garante seguransa ba loron rua ne’e,” Komandante PNTL Munisípiu Viqueque informa ba Agência Tatoli, iha ninia kna’ar-fatin, Besken, sábadu ne’e.

Nia hatutan, Natál no tinan foun la’ós buat foun ida, tanba kada tinan PNTL sempre koloka membru sira hodi asegura sidadaun sira.

“Buat hotu sei la’o di’ak no ema hotu-hotu sei kontribui atu situasaun la’o normál. Sidadaun sira bele-tuir misa, la’o livre, laiha hameasa ruma,” nia katak.

Nune’e iha loron 03 fulan-dezembru ne’e, Komandu PNTL Munisípiu Viqueque hasai karta aviza ho pontu sia (9) durante selebrasaun misa no simu tinan foun.

Pontu sia (9) mak tuir mai ne’e:

  1. Bandu loja no kioske iha munisípiu Viqueque fa’an fogete.
  2. PNTL munisípiu Viqueque sei halo pasa-revista ba loja no kioske sira, karik hetan fogete sei kaputra loja na’in ka kioske na’in.
  3. Bandu sunu fogete iha tempu Natál no simu tinan foun, liuliu iha Igreja no fatin públiku.
  4. Karik komunidade sira halo prezepiu tenke ho distánsia mteru 15 hosi estrada.
  5. Labele taka estrada.
  6. Labele hemu tua iha dalan-ninin no dansa iha prezepiu oin.
  7. Bandu motorizada sira uza kanu-resin iha tempu loron ka kalan.
  8. Labele tuur grupu iha estrada ninin iha kalan tuku 10.00 ba leten.
  9. Labele lori sasán kroat hanesan tudik, katana, rama, piska no sasán sira seluk ne’ebé lei númeru 5/2017 bandu.

Husi pontu sia sia (9) iha leten sidadaun sira la kumpri, PNTL munisípiu Viqueque sei foti medida no prosesa ba Ministériu Públiku.

“Ba labarik sira maka komete sei kaptura no bolu ninia inan-aman atu toma responsablidade ba hahalok oan nian,” Komandante PNTL Munisípiu Viqueque hateten.

Nune’e mós ba amprezáriu ne’ebé fa’an fogete sei prosesa ba lei no prezepiu hirak-ne’ebé la kumpri regra iha leten PNTL sei sobu.

Jornalista         : Vitorino Lopes da Costa
Editór               : Evaristo Martins

PUBLISIDADEiklan

HAKEREK NO HATÁN

Please enter your comment!
Please enter your name here