Restu mortál iha osoáriu, suku Odomau, postu administrativu Maliana, munisípiu Bobonaro. Imajen TATOLI/Sérgio da Cruz

BOBONARO,03 dezembru 2021 (TATOLI) – Konselu Veteranu Munisípiu Bobonaro husu Parlamentu Nasionál no Governu prevee orsamentu iha tinan fiskál 2022 hodi rezolve tiha restu restu mortál ne’ebé oras ne’e iha munisípiu tanba kaixaun balun dodok ona.

Prezidente Konselu Veteranu Munisípiu Bobonaro, Jaime Romão ‘Dotim’, informa, planu atu haloot restu-mortál iha tinan 2021, maibé tanba la hetan alokasaun orsamentu ba programa ne’e to’o agora seidauk bele realiza.

“Ha’u husu ba Governu no Parlamentu Nasionál atu tau orsamentu ba iha programa ne’e, tanba tinan barak ona restu mortál sira-ne’e rai hela de’it, kaixaun balun mós kuak hotu ona, balun dodok tán ona. Sé Governu mak nafatin la’o ho situasaun hanesan ne’e, oinsá mak atu valoriza eroi sira-nia luta ba rai ida-ne’e, karik tinan oin Governu la preokupa nafatin, ami lori ba rate antigu,” Veteranu Dotim informa ba Agência TATOLI, iha kna’ar-fatin, Maliana, sesta ne’e.

Prezidente Konselu Veteranu Munisípiu Bobonaro, Jaime Romão ‘Dotim’. Imajen Tatoli/Sérgio da Cruz.

Konsellu Veteranu Munisípiu Bobonaro identifika ona fatin tolu, atu haloot restu mortál ne’ebé daudaun ne’e konserva hela iha osoáriu postu administrativu Maliana no suku Malilait, postu administrativu Bobonaro.

Nia dehan, fatin hirak-ne’e oferese hosi komunidade, família martir no lia-na’in sira ho gratuita atu haloot restu-mortál sira iha fatin dignu.

“Fatin ne’e ida mak tún ba iha suku Ritabou nian ne’e, rai kuaza ektare rua hanesan ne’e, ida tán mak iha suku Malilait, agora eskavatór komesa hatetuk ona rai, ne’e mós ektare-rua no ida seluk mak iha kruzamentu postu administrativu Lolotoe nian,” nia katak.

Responsável Veteranu Bobonaro ne’e haktuir, rai-ne’ebé komunidade oferese iha Malilait bele amukula restu mortál 400-resin no iha Ritabou bele akumula 500 inklui mós iha Lolotoe.

Maibé tuir planu sei haloot mós iha postu administrativu sira seluk bainhira iha ona fatin, nune’e bele fasilita família vizita iha loron boot no sai hanesan fatin istória ba jerasaun foun.

Veteranu ne’e fó-sai katak, bainhira iha tinan oin governu la aprova orsamentu, parte Konselu Veteranu munisípiu Bobonaro sei hola inisiativa koordena ho família martir sira atu sosa materiál konstrusaun  no prepara kaixaun hodi ba haloot uluk iha Suku Malilait, tanba família prontu ona atu konstrui.

Entretantu, osoáriu iha munisípiu Bobonaro hamutuk rua, ida iha parte suku Odomau, postu administrativu Maliana akumula martire hosi 1975 to’o 1998 hamutuk na’in besik 700 no osoáriu iha suku Malilait Postu administrativu Bobonaro akumula restu mortál 200-resin.

Asuntu kombatente libertasaun nasionál, problema veteranu no restu mortál responsabiliza hosi Ministériu ba Asuntu Kombatente Libertasaun Nasionál lideradu Júlio Sarmento da Costa ‘Meta Mali.’

Papél hosi Ministériu ba Asuntu Kombatente Libertasaun Nasionál (MAKLN) nu’udar departamentu governamentál ho misaun koñese, ezekuta, koordena no avalia polítika, ne’ebé define ona no aprova hosi Konsellu Ministrru iha asuntu Kombatente Libertasaun Nasionál (Artigo 1º do Decreto-Lei n.º 19/2018, de 27 de dezembro).

Nune’e, proposta orsamentu tinan fiskál 2022 ne’ebé propoin hosi Ministériu ba Asuntu Kombatente Libertasaun Nasionál ho montante $99.684.114 (millaun $99-resin) ne’ebé koloka ba saláriu no vensimentu $ 731.126, bens (sasán) no servisu $ 3.580.128, kapitál menór $103.200, transferénsia públika $92.659.660 no kapitál dezennvolvimentu $2.610.000.

Montante orsamentu ne’e sei finansia  programa rua (2), sub-programa neen (6) no atividade hamutuk 11 inklui montante $92,659,660 destinada ba pagamentu pensaun kombatente libertasaun nasionál liuhosi kategoria transferénsia públika.

Hosi montante orsamentu $99.684.114 (millaun $99-resin) ne’e koloka ba programa ho kódigu 510 kona-ba boa governasaun no jestaun institusionál sei gasta $2,438,701 (millaun $2-resin) no programa ho kódigu 980 kona-ba igualdade jéneru no inkluzaun sosiál ho despeza $97,245,413 (millaun $97-resin).

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here