Atividade re-integra vítima dezastre naturál Eduardo Soares ho ninia família ba munisípiu Viqueque, sesta (03/12). Imajen TATOLI/Vitorino Lopes da Costa

VIQUEQUE, 03 dezembru 2021 (TATOLI)-Governu liuhosi Sekretaria Estadu Protesaun Sivil (SEPS) hamutuk ho Autoridade munisípiu Dili, iha sexta ne’e, re-intrega vítima dezastre naturál uma-kain ida ba munisípiu Viqueque.

“Família ne’e afetadu vítima dezastre naturál ne’ebé akontese iha loron 04 abril 2021,” Diretór Rekursu Umanu hosi munisípiu Dili, Tomas da Costa, informa ba Agência TATOLI, iha Administrasaun munisípiu Viqueque.

Prosesu re-intrega vítima inundasaun hamutuk família 14, ne’ebé SEPS no munisípiu Dili re-integra ba ida-idak ninia munisípiu orijinál, kompostu hosi munisípiu Ermera iha família neen, Bobonaro família rua, Ainaro família rua, Same família rua, Covalima família ida no Viqueque família ida.

“Nune’e sei iha família haat maka aban ami sei re-integra ba munisípiu orijinál no mós sei iha família hamutuk 81 sei iha prosesu hela,” nia akresenta.

Notísia relevante: SEPS kontinua apoia ai-han ba vítima inundasaun iha sentru akollamentu

Nia dehan, família sira rasik hili opsaun hakarak fila ba munisípiu, tanba ne’e SEPS no Autoridade Dili prontu fasilita vítima sira ba ida-idak ninia munisípiu inklui fó apoia materiál konstrusaun ba vítima sira.

“Ita halo atendimentu nu’udar ema umanu hodi lori ba munisípiu,” nia subliña.

Apoiu ne’ebé Governu oferese ba kada família mak hanesan matéria konstrusaun hanesan kalen 50, sementi saka 50, besi, pregu, lona no osan ho montante $1.000 hodi halo konstrusaun uma.

Iha fatin hanesan, Reprezentante Administradór munisípiu Viqueque, Isac da Cruz Esilo, agradese ba Governu no Autoridade munisípiu Dili tanba mai re-integra ona vítima ba ninia munisípiu orijen.

Nune’e mós, Vítima dezastre naturál, Eduardo Soares, agradese tanba bele oferese materiál kontrusaun.

“Durante ne’e ha’u hela iha Dili, maibé iha loron 04 abríl hasoru inundasaun hodi halo mota estraga ha’u-nia uma totál, atu fila ba fatin mós ladi’ak. Tanba ne’e, ha’u foti desizaun hodi fila mai ha’u-nia fatin orijinál,” nia dehan.

Vítima afetadu inundasaun antes ne’e hela iha área Moris Foun, suku Comoro no daudaun fila mai hela iha aldeia Kailoe, suku Uma-uain kraik, postu Viqueque villa, munisípiu Viqueque.

Atividade re-intrega vítima Eduardo Soares ho nia membru família na’in-haat, iha tuku tuku 21:45 kalan, iha administrasaun munisípiu, reprezenta hosi SEPS no autoridade munisípiu Dili, inklui pontu fokál protesaun sivil munisípiu Viqueque.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here