iklan

NASIONÁL, HEADLINE, POLÍTIKA

SEAK husu Grupu Arte Moris koopera ho Governu

SEAK husu Grupu Arte Moris koopera ho Governu

Ministeriu Justisa liuhosi Terra no Propriedade hasai Grupu Arte Moris nia sasán iha eis edifísiu artekultura Comoro, kinta (02/12). Imajen TATOLI/António Gonçalves.

DILI, 03 dezembru 2021 (TATOLI)—Sekretáriu Estadu Arte no Kultura (SEAK), Teófilo Caldas, husu ba grupu Arte Moris atu koopera ho Governu liuhosi Sekretáriu Estadu Terras no Propriedade (SETP) hodi hakruuk ba lei.

Notísia Relevante: Arte Moris rejeita armazen Bebora tanba la sufisiente hala’o atividade

“Ha’u husu ba alin sira hosi Grupu Arte Moris, dahuluk ita tenke kumpre lei. Daruak, ita buka atu koopera ho Sekretáriu Estadu Terra no Propriedade ba saida mak sira atribui ona,”  Sekretáriu Estadu Arte no Kultura (SEAK), Teófilo Caldas, hateten ba jornalista sira, iha Parlamentu Nasionál, Dili, ohin.

Governu liuhosi Sekretáriu Estadu Terras no Propriedade atribui ona Armazen Bebora ba Grupu Arte Moris sira, mezmu ho kondisaun ne’ebé minimu, depois sira tenke dezenvolve tanba labele depende demais ba Governu, no sira tenke hakaas an no esforsu atu hamriik iha sira-nia ain rasik, labele hamriik iha ema seluk nia ain leten.

Nune’e, Governante ne’e informa, horisehik nia parte tenta atu hasoru ho Prezidente Asosiasaun Arte Moris, Iliwato Dana Bere, maibé la konsege tanba Prezidente Arte Moris okupadu tebes no kontinua tau matan ba sira.

“Hanesan Sekretáriu Estadu Arte no Kultura, ami kontinua tau matan no fó apoia ba grupu hotu-hotu, inklui grupu Arte Moris. Hosi ne’e, solusaun ida mak tenke ba okupa lai Armazen Bebora nian, hafoin mak ami haree took oinsá ami bele kria kondisaun. Hanesan Sekretáriu Estadu Arte no Kultura, Sekretáriu Estadu Terra no Propriedade no Konsellu Veteranu ita haree oinsá mak kria kondisaun maibé importante mak ita iha lai fatin,” nia dehan.

Notísia Relevante: Ramos Horta oferese rezidénsia Metiaut ho temporariamente ba Arte Moris rai sasán

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!