Monumentu eroi Gleno. Imajen/Espesiál

DILI, 03 dezembru 2021 (TATOLI)–Prezidente Konsellu Veteranu munisípiu Ermera, António Soares ‘Tatamailau’, informa, iha restu mortál ne’ebé rekolla ona, tau iha monumentu eroi Gleno hamutuk 11.756 no seidauk hakoi tanba laiha semitériu.

“Restu mortál hirak ne’e kompostu hosi ruin 3.756 no fatuk hamutuk 8.000, tanba buka ruin la hetan,” Veteranu Tatamailau informa ba Agência TATOLI, via telefónika, sesta ne’e.

Aleinde ne’e, Governu iha ona planu halo konstrusaun jardín eroi munisipál, maibé seidauk konsege tanba situasaun COVID-19.

Notísia relevante: Meta Malik: “Haloot restu mortál presiza hadi’a Jardim dos Herois”

“Iha ona informasaun hosi nasionál katak tinan oin sei haruka empreza mai halo konstrusaun semitériu eroi, ami hein hela tanba fatin ne’ebé atu konstrui ne’e mós identifika ona iha suku Fatucero, postu Railaco, munisípiu Ermera,” nia akresenta.

Nune’e, Prezidente Konsellu husu Governu tenke aselera lalais tanba Konsellu Veteranu munisipál nia preokupasaun mak tenke hakoi lalais.

Restu mortál hamutuk 3.096 iha osuáriu Manatuto

Iha sorin seluk, Prezidente Konsellu Veteranu Munisípiu Manatuto, Boaventura Soares ‘Tocha’ hateten, iha munisípiu Manatuto rasik restu mortál ne’ebé rai iha osuáriu iha fatin rua, ida iha postu Manatuto villa no iha postu Natarbora, ne’ebé rekolla iha tinan 2016.

“Restu mortál iha ita rekolla tau iha osuáriu postu administrativu Manatuto villa hamutuk 96 no Natarbora hamutuk 3.000 resin,” Boaventura Soares “Tocha” hateten.

Enkuantu, kona-ba prosesu haloot restu mortál iha postu Natarbora, iha fulan-ida liubá empreza halo ona konstrusaun semitériu jardín eroi, maibé ba postu Manatuto villa rasik seidauk.

“Tanba ne’e, ha’u rekomenda ba Governu karik bele iha tinan oin sira, bele konstrui ona jardín eroi, tanba restu mortál ne’ebé ita rai kleur mós fó impaktu fali ba família sira ne’ebé sei moris, tanba ita moris ho kultura,” nia tenik.

Jornalistsa : Arminda Fonseca

Editora       : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here