Atividade perfurasaun iha posu Feto Kmaus iha Covalima, halo mina-teen suli tuir baleta no nalihun iha populasaun nia to’os laran. Imajen TATOLI/Celestina Teles

COVALIMA, 03 dezembru (2021)—Komandante PNTL Munisípiu Covalima, Superintendente António Maria de Sá, husu ba autoridade Nasionàl Petróleu no Minerál (ANPM) atu kontrola kompañia Timor Resources ne’ebè halo perfurasaun posu Feto Kmaus iha Covalima.

“Bazea predisaun kompañia halo perfurasaun to’o metro 1000 mak foin hetan mina, maibè perfurasaun seidauk to’o trajetu mina-teen sulin hodi fó impaktu ba ita-nia komunidade nia to’os no ambiente,” Komandante PNTL, Superintendente António Maria de Sá liuhosi nia diskursu bainhira partisipa iha sensibilizasaun lei Kódigo Minéiru ne’ebé organiza hosi ANPM no realiza iha salaun administrasaun Covalima, sesta ne’e 

Ho akontesimenu ne’e, Komandante PNTL ne’e husu ba ANPM atu fó xamada atensaun ba kompañia Timor Resources, relasiona ho foin lalais mina-teen sulin sai iha baleta no fó impaktu ba komunidade nia to’os no meiu ambiente ne’e labele akontese tán.

Prezidente ANPM, Florentino Soares Ferreira, klarifika katak foin lalais akontesimentu ne’e normál tanba iha situasaun perfurasaun mina ni’an sempre enfrenta risku sira hanesan ne’e. 

“Ho risku sira-ne’e mak ita hatuur ona saida mak ita bolu planu jestaun, ekipa diskute ona ho Timor Resources. Ita hatuur ona investigasaun ida buat hotu ita tenke halo tuir saida mak ita bolu kontratu partila produsaun PCI, neste momentu halo inspesaun no investigasaun hosi ne’e mak ami bele fo ami nia xamada,” nia esplika.  

Bazea ba akontesimentu ne’e kompaáñia Timor Recourses tenke responsabiliza hodi hamoos mina-teen ne’ebé sulin tuir baleta no suli estraga komunidade nia to’os. 

“ANPM nia kompeténsia no padraun ne’ebè iha indústria, ami servisu hamutuk ita hatene iha estudu impaktu ambientál, planu jestaun ambientál mak ita-boot sira haree mina ne’ebè mak sai mai afeeta ba komunidade nia to’os, sira tenke hamoos tanba ne’e hanesan responsabilidade,” nia haktuir. 

Timor Resources sira halo tuir padraun sira-ne’ebè mak iha ida-ne’e normal iha mundu barak buat hirak ne’e akontese. Timor foin mak primeira vez halo perfurasaun mina monu iha komunidade nia leet, maibé iha nasaun barak perfurasaun fó impaktu aat liu ida-ne’e. 

“Ami komprende iha Timor ita foin mak primeira vez haree ida-ne’e, ema balun ezajera iha mídia maibe tuir ami téekniku ne’e faz parte hosi prosesu perfurasaun hanesan. Ita-boot sira fura bee-moos dala ruma mina sai mai hanesan.  Tanba perfurasaun ida-ne’e boot, nia hetan mina balun iha profindade badak mina sempre iha presaun sai mai ho gás.  Ita la konsege prevee projesaun iha fatin balun, ita la espera atu hetan,” nia informa. 

Maske ho akontesimentu ne’e la’ós situasaun ne’e mak bo’ot maibé sei bele maneja no kontrola  situasaun balun ne’ebé mak akontese. 

“Ita preokupa mak gás no mina sai mak depois hasoru ahi nia raventa, ida-ne’e sai problema boot. Tékniku halo servisu didi’ak hosi Timor Resources esforsu. Ami mós superviziona nafatin bazea ba kompeténsia no esperiénsia, ita la’ós foin mak halo perfurasaun,” nia hatutan. 

ANPM la’ós foin mak halo perfurasaun maibe halo ona perfurasaun mina lubuk ida iha tasi laran. Tinan ne’e sei halo perfurasaun posu tolu no tinan oin mós halo tan perfurasaun ne’ebé boot no ANPM la’ós foin atu haree perfurasaun hanesan ne’e. 

“Tanba perfurasaun iha rai-maran, populasaun hakfodak ho buat sira hanesan ne’e. Ho ida-ne’e  sei eduka neineik povu no komunidade. Ita seidauk estraga ambiente aat liu maibe sei bele kontrola hela,” nia dehan.

Ho nune’e, ba oin ANPM sei kolabora hamutuk tuir dalan ne’ebé mak ANPM halo, la’ós atu fó xamada lae, tanba prosesu iha tuir kontratu no lei ne’ebé iha no prosesu la’o hela. 

Jornalista : Celestina Teles

Editór      : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here