Xefe Estadu-Maiór Forsa Armada (XEMFA), Brigadeiru Jenerál Calisto dos Santos Coli ‘Coliati’ . Imajen TATOLI/Egas Cristóvão

DILI, 03 dezembru 2021 (TATOLI)—Parlamentu Nasionál konsidera proposta ezonerasaun no nomeasaun ba Xefe Estadu-Maiór Forsa Armada (XEMFA), Brigadeiru Jenerál, Calisto dos Santos ‘Coliati’ tur lei Defeza Nasionál.

Notísia Relevante: Governu ezonera Calisto dos Santos ‘Coliati’ hosi XEMFA  

“Lei ne’ebé Parlamentu Nasionál halo Governu mak ezekuta tuir norma ne’ebé mak define. Purtantu membru instituisaun kumpre desizaun superiór bainhira deside,” Prezidente Komisaun A trata asuntu Konstituisional no Justisa, Joaquim dos Santos, hateten ba Agência TATOLI, iha Parlamentu Nasionál, sesta ne’e.

Periódu ida lei ne’e regula ba mandatu kumprimentu lei hosi membru instituisaun no fó marjen mandatu ida no bainhira mandatu hotu iha posibilidade bele rekondúz ka substituisaun.

Proposta ezonerasaun no nomeasaun Xefe Estadu-Maiór Forsa Armada no Komandante Komponente FALINTIL-Forsa Defeza Timor-Leste bazea ba reuniaun Konsellu Defeza Militár.

Proposta Governu nian bazea ba lei númeru 11/202, 23 juñu, ne’ebé prosede ba alterasaun lei númeru 3/201, 21 abríl kona-ba Lei Defeza Nasionál, iha artigu 17 (Kompeténsia Primeiru-Ministru), alinea d, propoin ba konsellu Ministru hamutuk ho membru Governu ne’ebé responsavél iha área Defeza kona-ba nomeasaun no ezonerasaun ba Xefe Estadu Maiór Jenerál Forsa Armada, Vise Xefe Estadu Maiór Jenerál Forsa Armada, Xefe Estadu-Maior Forsa Armada no Komandante komponente sira.

Governu halo proposta, maibé Prezidente Repúblika mak iha kompeténsia atu nomea no ezonera ho baze ba proposta hosi Governu.

Tanba, iha artigu 14 (kompeténsia ba Prezidente Repúbliku) alinea e, prevista nomea no ezonera bazea ba proposta Governu nian, Xefe Estadu Maiór Jenerál Forsa Armada, Vise Xefe Estadu Maiór Jenerál Forsa Armada, Xefe Estadu-Maior Forsa Armada no Komandante komponente sira.

Bainhira simu proposta Governu nian, Prezidente Repúblika nu’udar Komandante Supremu Forsa Armada sei uza artigu 19 (Konsellu Superiór Defeza no Seguransa) númeru 3, katak konsellu superiór defeza militár reúne obrigatoriamente ba matéria respeitante ba alterasaun estrutura orgánika F-FDTL, kona-ba proposta nomeasaun no ezonerasaun ba kargu CEMGFA, Vice-CEMGFA no CEMFA, no Dispozitivu iha F-FDTL.

Prezidente Komisaun A, Joaquim dos Santos, klarifika interpretasaun termoloja tuir lei kuandu uza liafuan ezonerasaun no nomeasaun.

Tama iha kontestu terminolojia ‘ezonerasaun’ kauza ne’ebé obriga atu hapara mandatu dalan klaran tanba mandatu hotu ona ka nessesidade seluk, membru ne’e atu ba asume ka membru refere ezerse funsaun ladún di’ak ka na’in rasik husu rezigna-an.

No, nomeasaun ne’e tanba iha konfiansa polítika hosi orgaun ida ba ema ida atu asume kargu ruma iha instituisaun.

“Tan ne’e ezonerasaun no nomeasaun bazea ba norma no nesesidade instituisaun nian la viola sidadaun nia direitu fundamental,” nia dehan.

Nune’e mós, Prezidente Komisaun B trata asuntu Defeza no Seguransa ho Negósiu Estranjeiru, José Agostinho Sequeira ‘Somotxo, hateten interpretasaun linguajen ‘ezonerasaun’ hanesan ‘subtituisaun’ ne’ebé la ofende no normal.

“Liafuan ‘ezonerasaun’ ita bele interpreta hanesan ‘subtituisaun’ ne’ebé la ofende ema no ida-ne’e normal. Tanba ne’e, mudansa iha instituisaun militár (F-FDTL) ne’e normal,” nia esplika.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here