CNE realiza atividade edukasaun sívika iha salaun Parokia Ossu, munsípiu Viqueque, sesta (03/12). Imajen TATOLI/Vitorino Lopes da Costa

VIQUEQUE, 03 dezembru 2021 (TATOLI)— Komisaun Nasionál Eleisaun (CNE) realiza edukasaun sívika, sesta ne’e, iha postu administrativu Ossu, munisípiu Viqueque, hodi fanun eleitór sira partisipa eleisaun prezidensiál iha marsu 2022.

Komisáriu CNE, Elavio da Costa Monteiro Almeida, hateten, atividade ho tema ‘promove esklaresimentu kona-ba aktu eleitóral no eleisaun ne’ebé reziliénte ho COVID-19’ hodi fanun eleitór sira partisipa eleisaun.

“Objetivu edukasaun sívika atu autoridade, juventude no estudante bele hatene liu kona-ba prosesu eleisaun tanba sei hala’o iha tempu pandemia, entaun espera bele halo eleisaun reziliénte ho COVID-19, ne’ebé ita hasoru eleisaun ne’e ho situasaun ne’ebé ita hotu la espera, maibé hakarak ka lakoi ita tenki ultrapasa,” Komisáriu CNE hateten ba Agência TATOLI, hafoin remata abertura atura edukasaun sívila, iha salaun Parokia Ossu, munsípiu Viqueque.

Notísia relevante: CNE-STAE halo edukasaun sívika ba estudante Santo Estevão Viqueque

Ho situasaun pandemia maka CNE tenta hakbesik sidadaun atu partisipa másimu iha eleisaun tinan oin.

“Prezidente Repúblika iha janeiru tinan oin sei dekreta loron eleisaun, tanba ne’e ita sei iha fulan-ida,” nia akresenta.

Iha fatin hanesan, Administradór postu Ossu, Agostino de Sousa, konsidera atividade ne’e importante ba eleitór foun sira ho idade 17.

“Agradese ba komisáriu no ninia ekipa tomak ne’ebé mai halo edukasaun sívika iha postu Ossu. Edukasaun sívika parte importante ba ami autoridade lokál hodi hatutan ba joven sira ne’ebé ho idade 17 atu partisipa eleisaun. Tanba liuhosi edukasaun ne’e joven sira kompreende ho di’ak kona-ba eleisaun,” nia dehan.

Nune’e, autoridade postu ne’e husu ba xefe suku sira atu halo komunikasaun ho CNE, nune’e aban bainrua bele realiza eleisaun ho susesu tanba uluk eleisaun períodu dahuluk iha munisípiu Viqueque mosu violénsia.

“Iha períodu sira tuir mai, eleisaun ladún mosu violénsia, tanba ne’e ita nafatin halo komunikasaun no koordenasaun ho parte hotu hodi asegura festa demokrasia ho susesu,” nia enkoraja.

Atividade ne’e partisipa hosi Diretór Sekretaria Tékniku Administrasaun Eleitorál (STAE) Viqueque, Diretór CNE Viqueque, Xefe suku sanulu iha postu Ossu, Reprezentante Partidu Polítiku sira, Polísia Nasionál Timor Leste (PNTL) hosi Eskuadra Ossu, estudante Pre-sekundáriu Mundu Perdidu no Eskola Sekundária Jerál Olokassa.

Jornalista : Vitorino Lopes da Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here