Diretòr STAE Covalima sesante, Cláudio Cardodo, entrega relatóriu servisu ba diretòr STAE atuál, Francisco Guamão, iha serimónia transferénsia servisu ne’ebé hala’o iha salaun STAE Covalima. Imajen Tatoli/Celestina Teles.

COVALIMA, 03 dezembru 2021 (TATOLI)—Diretòr Atuál STAE Munisípio Covalima, Francisco Gusmão husu apoiu máximo hosi Ditetór STAE sesante Cláudio Cardoso nune’e bele realiza atividade eleisaun nian iha STAE Covalima ho susesu.

“Maske bele sevisu kleur iha STAE hodi hala’o atividade rutina, maibé foun ba ha’u asume kargu diretòr. Ho ida-ne’e mak presiza apoiu másimu hosi diretór STAE sesante, Cláudio Cardoso, ho funsionáriu tomak iha atividade eleisaun nian ne’ebè mak hala’o iha STAE Covalima bele susesu,” Francisco Gusmão hateten no husu liuhosi nia diskursu bainhara STAE Covalima realiza serimónia transferénsia servisu (hand over), iha salaun STAE Covalima, sesta ne’e. 

Maske nia parte servisu kle’ur iha STAE Covalima maibé foin mak asume kargu diretór ne’e, entaun presiza apoiu hosi diretór STAE sesante tanba nia lidera STAE durante tinan barak ona.

“Ohin halo transferensia servisu diretór sesante ba diretór atual ne’ebè liu hosi selesaun pur méritu bazea ba lei funsaun públika. Ha’u agradese ba diretór STAE sesante no funsionáriu sira iha nia mandatu sempre iha koordenasaun di’ak ho nia funsionáriu sira. Tanba ne’e, ha’u sei kontinua dezenvolve di’ak liután servisu ne’ebè mak diretór STAE sesante husik hela,” nia dehan. 

Diretór sesante, Cláudio Cardoso, prontu atu apoiu diretòr STAE atuál hodi hala’o servisu iha STAE Covalima tanba servisu STAE haree ba kotuk hodi hateke ba oin no esperiénsia todan ka kmaan, sente hodi hala’o atividade rutina no normál.

Tanba, tuir nia, STAE tenke sai matadalan no servidór ba partidu politiku sira hotu, órgaun  STAE ho CNE mak sai mahon ba partidu sira hotu. 

Reprezentante Diretór STAE Nasionàl, Adolfo Natália da Silva, agradese ba diretór sesante ne’ebé dedika an servisu iha STAE Covalima durante tempu naruk nia laran.

“Ha’u louva no agradese ba diretór sesante ne’ebè mak dedika nia servisu durante tinan naruk, tanba atu sai diretór la fasil, no iha biban ne’e mós hato’o parabéns ba Diretòr STAE atuál hodi hala’o servisu ho responsabilidade,” nia dehan.

Iha serimónia tranbsferénsia servisu ka hand over ne’e, reprezenta Diretòr Jeral STAE Nasionàl entrega mos sertifikadu apresiasaun ba Diretòr STAE sesante ne’ebè maka asumi kargu diretor durante tinan barak ona.

Partsipa iha serimónia transferénsia servisu ne’e mak reprezentante Diretòr Jeral STAE Nasionàl, reprezentante administradór Covalima, Komandante PNTL Covalima reprezenta hosi komandante operasaun Covalima, Gaspar da Costa Mendonça no funsionáriu STAE Covalima. 

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here