Sentru Juventde Munisípiu Bobonaro, kinta ne’e, distribui ona fundu hodi realiza desportu komunitária iha postu administrative neen (6) iha munisípiu Bobonaro. Imajen Tatoli/Sérgio da Cruz.

BOBONARO, 02 dezembru 2021 (TATOLI) – Sentru Juventude Munisípiu Bobonaro (CJMB, sigla portugés) kinta ne’e, distribui fundu hosi Sektretaria Estadu Juventude no Desportu (SEJD) ba postu administrativu sira iha munisípiu Bobonaro hodi realiza jogu komunitáriu.

Diretór CJMB, Alcino Lopez, informa, totál orsamentu ne’ebé SEJD aloka hamutuk $37,350.00, hosi montante ne’e sei distribui ba postu administrativu neen (6) iha munisípiu Bobonaro ne’ebé gasta ba prémiu $20.400.00 no kustu operasionál $16,950.00.

Totál orsamentu ne’e CJMB distribui uluk ba iha postu administrativu Maliana $5.773,00, Atabae $4,756.00, Balibo $59434.00, Cailaco $6,112.00 no Bobonaro $9,502,00.

“Enkuantu postu administrativu Lolotoe nian ita seidauk bele distribui tanba seidauk submete proposta mai, maibé sira-nia osan hamutuk $5,773.00, sei fó tempu loron-lima atu hatama proposta, sé lae osan ba fali kaixa Estadu,” nia informa iha salaun Sentru Juventude Bobonaro, suku Holsa, kinta ne’e.

Desportu komunitáriu ne’ebé atu realiza ho modalidade futeból, voleiból, atletizmu no jogu tradisionál kalik no sira seluk.

Tuir tabela orsamentu ne’ebé gasta ba prémiu kada postu administrativu ho montante $3.400,00 no kustu operasionál postu Atabae sei gasta $1,356,00, Balibo $2,034,00, Bobonaro $6,102.00, Cailaco $2.712.00, Lolotoe $2.773.00 no Maliana $2,773.00.

Enkuantu orsamentu hirak-ne’e distribui ho montante diferente, tanba postu administrativu balun suku barak no balun menus.

“Orsamentu ida-ne’e hanaran orsamentu transferénsia públika, orsamentu ne’e funsionáriu públiku labele hetan, karik apoia tékniku no serbisu voluntáriu no fasilita pulsa bele, tanba parte SEJD no Komisaun Antí Korrupsaun sei halo auditoria ba relatóriu ne’e bainhira identifika sei prosesa tuir lei,” nia hateten.

Entretantu, Asesór Prezidente Autoridade Munisípiu Bobonaro, Helder dos Santos, agradese ba SEJD, tanba iha  ona hanoin atu halibur joven sira no fó oportunidade atu espresa kreatividade iha área desportu nível baze  nian.

Maske SEJD foin halo transferénsia orsamentu mai konta bankária Sentru Juventude Bobonaro iha 29 novembru ne’e, maibé jogu komunitáriu iha postu administrativu Bobonaro realiza tiha ona iha semana kotuk.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here