Alunu IDN na’in-19 hala’o peskiza iha Bobonaro

BOBONARO,03 dezembru 2021 (TATOLI) – Alunu na’in-19 hosi Institutu Defeza  Nasionál (IDN) ne’ebé hala’o kursu kona-ba Estadu Maiór Konjunta Integradu (CEMCI, sigla portugés) no kursu Pos-Graduasaun Estudu Estratéjiku no Reziliénsia Nasionál (PGEERN) hala’o peskiza munisípiu Bobonaro hodi kompleta teze.

Alunu hirak-ne’e mai hosi ofisiál Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL) na’in-16 no funsionáriu superiór hosi Ministériu Negósiu Estranjeiru no Kooperasaun (MNEK) na’in-tolu ne’ebé remata ona kursu (CEMCI) besik tinan ida no kursu (PGEEREN) durante fulan-tolu.

Atividade dahuluk iha Bobonaro, vizita dahuluk ba komandu PNTL Bobonaro, administrasaun munisípiu, Postu UPF kompaña ALFA, Tunubibi no Tapo-Memo, postu  F-FDTL Tunubib no Postu F-FDTL no UPF iha Derokren, postu administrativu Balibo.

Koordenadór Kursu Institutu Defesa Nasionál, Tenente Koronél Bendito Dias Quintas “Punu Fanu”, esplika objetivu hosi vizita estudu ne’e atu halo levantementu dadus ba situasaun defeza no seguransa, polítika, sósiu-ekonómiku, sosiál no finanseira iha munisípiu Bobonaro.

“Ami-nia vizita ida-ne’e atu fasilita ita-nia alunu sira kompleta teze finál ne’ebé dosente sira fó, depois ami mós halo familiarizasaun ba terrenu, atu ami bele domina situasaun terrenu nível nasionál no munisípiu ne’e iha fronteira, depois nu’udar ofisiál bele komanda rejimentu no divizaun sira hodi projeta sira-nia ema iha kualkér infiltrasaun ne’ebé akontese,” nia informa iha salaun administrasaun Bobonaro, sesta ne’e.

Entretantu, Komandante PNTL Munisípiu Bobonaro, Superintendente Antoninho Mauluta, kontente no orgullu bele hetan vizita hosi alunu IDN atubele fahe informasaun situasaun seguransa ba malu hodi kompleta sira-nia teze finál.

Superintendente ne’e konsidera fahe inforomasaun ba malu liuhosi estudu ida-ne’e mós bele hafasil na’in ulun sira atu foti desizaun kona-ba problema ne’ebé komandu hasoru iha terrenu.

“Ohin sira-nia vizita ne’e ami informa ba sira kona-ba problema seguransa ne’e oras ne’e daudaun komandu hasoru, depois ho problema sira-ne’e, fila sira sei halo avaliasaun no analiza kle’an ida depois sira hakarek teze hodi aprezenta to’o ikus ita-nia ulun boot sira mós hatene kona-ba problema loloos komandu hasoru,” nia katak.

Purtantu, atividade ne’e realiza ona iha munisípiu Viqueque, Manufahi no Covalima, tuir planu semana oin sei kontinua ba iha Rejiaun Administrativa Espesiál Oe-cuse Ambeno (RAEOA).

Tuir dadus graduadu ne’ebé finaliza ona CEMCI ba períodu dahuluk iha tinan 2018 hamutuk na’in neen (6) komposta hosi Tenente Koronél na’in-rua, Kapitão Fragata na’in-ida hosi komandu F-FDTL no Superintendente Asistente na’in-tolu hosi komandu PNTL.

Enkuantu, graduadu ba kursu PGEERN hahu hosi primeiru kursu tinan 2017 to’o IV kursu tinan 2020 hamutuk na’in-ualu.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here