Komadante PNTL munisípiu Viqueque, Supertendente Polísia, Sebastião Alves Quintão. Imajen TATOLI/Vitorino Lopes da Costa

VIQUEQUE, 03 dezembru 2021 (TATOLI)—Komunidade suku Uaibobo, postu administrativu Ossu, munisípiu Viqueque, kuarta, (1/12) maizumenus tuku 12.00, hetan Paulo da Costa, idade 52 latan iha mota Aenau ho kondisaun laiha ona iis.

“Ami konsege halo kontaktu ho família iha kuarta ne’e kedan no rekolla informasaun hosi família katak, ema ne’e moras antes ona. Nia hosi suku Uaibobo, maibé ninia rezidénsia atuál iha Baucau,” Komadante Polísia Nasionál Timor Leste (PNTL) munisípiu Viqueque, Supertendente Polísia, Sebastião Alves Quintão, informa ba Agência TATOLI, iha Komandu munisípiu Viqueque, sesta ne’e.

Komandante Polísia munisipál ne’e haktuir, Paulo da Costa sai husi Baucau atu vizita ninia inan rasik ne’ebé moras iha Uaibobo, no la kleur nia para motor iha mota tanba hahú sente moras.

“Ikus mai monu iha mota laran, nia hemu bee-mota to’o hakotu iis,” Sebastião Alves konta tuir.

Nune’e, Polísia sei nafatin rekolla informasaun iha fatin akontesimentu no halo kontaktu ho xefe suku no família matebian.

“Família lakoi lori mate-isin ba autopsia no hakarak haloot ona tanba família sira hatene katak la’ós ema ruma maka oho maibé antes ne’e sofre ona moras. Tanba ne’e, família deside haloot tuir tradisaun. Maski nune’e, relatóriu sira ne’ebé rekolla iha terrenu sei aprezenta ba Komandante Jerál,” nia akresenta.

Iha fatin ketak, Xefe suku Uaibobo, Golarte Melo Guterres, hateten, matebian hanesan abitante ida hosi suku ne’e rasik, maibé molok ne’e família matebian la deskobre buat ruma.

“Bainhira komunidade lokál sira hetan mate-isin iha mota iha meiudia, ha’u informa kedas ba Komadante Polísia Nasionál Timor-Leste Eskuadra Ossu no família matebian mós mai no konfirma katak sira-nia ema duni. Ha’u kontaktu ba matebian ninia fe’en dehan nia sai hosi uma madrugada. Tuir família, matebian sofre moras bibi maten,” Líder komunitáriu ne’e haktuir.

Nune’e, hafoin hetan mate-isin iha mota, iha tuku 16:00 lorokraik, parte família, autoridade lokál, hamutuk ho pesoál saúde evakua mate-isin hosi fatin akontesimentu.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here