Delegasaun Timor-Leste no WIPO hasai foto hamutuk hafoin selebra akordu, iha Jenebra, tersa (02/12). Imajen/MKAE

DILI, 02 dezembru 2021 (TATOLI)–Governu Timor-Leste liuhosi Ministériu Koordenadór Asuntu Ekonómiku (MKAE) selebra akordu ho Organizasaun Mundiál Propriedade Intelektuál (WIPO, sigla inglés) kona-ba konjuntu inisiativa atu proteje obra intelektuál no ninia autór sira.

Selebrasaun akordu propriedade inteletuál liuhosi asinatura ne’e hala’o iha loron 30 novembru 2021, iha kuartél jerál WIPO iha Jenebra, ne’ebé hosi parte Timor-Leste reprezenta hosi Ministru Koordenadór Asuntu Ekonómiku Joaquim Amaral, no hosi parte parseiru mak Diretór Jerál WIPO, Daren Tang, ne’ebé asiste hosi Vise-Ministru Komérsiu no Indústria, Domingos Lopes Antunes no Reprezentante Misaun Permanente Timor-Leste iha Jenebra, Embaixadora Lurdes Bessa.

“Ha’u sente orgullu bele asina memorandu entendimentu ho Ministru Joaquim Amaral tanba akordu ne’e nu’udar baze harii ekosistema  inovasaun Intellectual property  Timor-Leste nian,” Diretór Jerál WIPO, Daren Tang, hateten liuhosi nota ne’ebé Agência TATOLI asesu, kinta ne’e.

Komponente imporatante hosi propriedade intelektuál maka patente, marka rejistrada, dezeñu industriál, indikasaun jeográfika no segredu komersiál sira.

Akordu ne’e hanesan elementu importante hodi tulun no apoia dezenvolvimentu ekonómiku sustentável hodi  dezenvolve infraestrutura kona-ba kriasaun Sentru Apoia Inovasaun Industriál Intelektuál no hamosu kuadru jurídiku tuir prátika internasionál kona-ba propriedade intelektuál.

Nune’e, Diretór Jerál WIPO konsidera propriedade intelektuál importante ba país hotu, nune’e mós ba Timor-Leste, tanba ne’e sei haree kona-ba marka (brand), dezeñu inklui teknolojia to’o bele apoiu  indústria kafé Timor-Leste.

Notísia relevante: Expo Dubai 2020: Kafé Timor atrai turista vizita pavillaun Timor-Leste

Propriedade intelektuál hanesan patente, direitu autorál ho marka rejistrada ne’ebé sei permite kada indivíduu hetan rekoñesimentu ka benefísiu finanseiru hosi buat ne’ebé maka kria, inklui sei  promove ambiente no kreatividade ho inovasaun ba obra hirak ne’ebé hamosu hosi kada individuu.

Iha futuru akordu ne’e nu’udar esperansa foun ba timor-oan sira ne’ebé serbisu iha área ezistente sira, ne’ebé sai kapítulu importante hodi  insentiva kada  indivíduu iha talentu hodi dezenvolve matenek hodi sai nu’udar direitu autorál ne’ebé hetan ona protesaun másima hosi lei ne’ebé eziste.

Aleinde ne’e, WIPO kuntinua enkoraja timor-oan sira hodi bele hola parte iha akademia WIPO hodi oferese kursu ba timor-oan sira mellora kapasidade rekursu umanu.

“Onra no urgullu ba momentu ida-ne’e, tanba liuhosi WIPO nia tulun, Timor-Leste bele avansa tan pasu ida atu proteje talentu ka obra ne’ebé timor-oan sira halo iha atividade loron-loron,” Ministru Joaquim Amaral apresia.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here