Xefe Suku Leohitu, Benjamin Maia. Imajen Tatoli/Sérgio da Cruz.

BOBONARO, 02 dezembru 2021 (TATOLI) – Programa naroman ba suku ne’ebé dezeña hosi Governu liuhosi Sekretaria Estadu Komunikasaun Sosial (SEKOMS) ladún funsiona ho di’ak tanba joven voluntáriu sira balun la ativu ona.

Xefe Suku Leohitu, Benjamin Maia, informa dezde implementasaun programa ne’e iha 2019 atividade hotu la’o ho di’ak, tanba ekipa hosi nasionál sempre kontrola, maibé hahú hosi marsu 2021 atividade paradu to’o agora.

“Programa ne’e paradu fulan sia (9) ona, ninia problema mak ne’e ita-nia joven sira serbisu orsamentu laiha, depois ida tán mak transporte atu fasilita joven sira atu ba foti informasaun iha komunidade sira. Ida-ne’e mak kestaun tanba joven sira mós iha nesesidade entaun presiza tebes osan,” Xefe suku Leohitu informa ba Agência Tatoli, iha administrasaun munisípiu Bobonaro, kinta ne’e.

Nia fó-sai katak, joven sira-ne’ebé durante ne’e halo kobertura ba programa suku nian hamutuk na’in-neen (6) komposta hosi mane na’in-lima no feto na’in-rua. Maibé daudaun ne’e na’in-rua mk sei ativu, restante la ativu ona tanba forma ona família tenke buka atividade seluk hodi responde ba nesesidade uma-laran.

Maske durante ne’e laiha orsamentu atu fasilita voluntáriu hirak-ne’e, maibé Liurai Leohitu ne’e informa, iha joven balu hola inisiativa nafatin rekolla  informasaun ba kualkér atividade ne’ebé akontese iha suku.

Maibé tanba liña internete ne’ebé governu instala iha sede suku hamosu preokupasaun, tanba koordenadór  programa la fó hatene kódigu Wi-Fi ba joven sira entaun labele espalla informasaun suku nian ba públiku.

“Koordenadór ne’e horisehik mak foin mai tanba nia iha Dili, entaun ita-nia joven ida-ne’ebé durante akompaña ha’u ba enkontru ho ajénsia sira-nian bele fó kode ba joven ne’e atu fó-sai fali informasaun sira-ne’e bele públika fali,” nia dehan.

Problema hirak-ne’e, parte autoridade lokál submete ona proposta ba Sekretaria Estadu Komunikasaun Sosiál, maibé até agora seidauk hetan resposta ruma.

Maske atividade ne’e paradu hela, maibé líder komunitária ne’e konsidera programa ne’e di’ak tebes tanba bele aumenta joven sira-nia abilidade iha área komunikasaun sosiál no  bele promove informasaun iha baze ba nasionál.

Enkuantu daudaun ne’e ekipamentu hanesan laptop ida, komputadór ida, gravadór audio ida, kamera no printer ne’ebé governu fasilita sei funsiona ho di’ak. Programa naroman bas uku ne’e lansa ofisialmente iha suku Rotutu, postu administrative Same Vila, munisípiu Manufahi iha loron 20 jullu 2019. Hafoin lansa programa ne’e implementa iha territóriu nasionál ba suku hirak-ne’ebé idenfikadu.

Iha Orsamentu Jerál Estadu (OJE) tinan 2019, SEKOMS hetan millaun $4,243 ne’ebé koloka ba saláriu no vensimentu millaun $1,855, kapitál menór rihun $219 no transferénsia públika millaun $2,169.

Hosi montante millaun $4,243 ne’e prevista ba programa ho kódigu 510 kona-ba boa governasaun no jestaun institusionál gasta rihun $717, programa ho kódigu 437 kona-ba diseminasaun informasaun no apoia Portavós Governu nian ho montante rihun $479.

Nune’e mós programa ho kódigu 438 kona-ba kobertura hosi mídia ba eventu ofisiál no jestaun komunikasaun ho mídia gasta rihun $648 no programa ho kódigu 439 kona-ba garante liberdade espresaun no asesu ba informasaun gasta millaun $ 2,400.

Notisia relevante:http://www.tatoli.tl/2019/07/20/programa-naroman-ba-suku-ofisialmente-lansa-ona-iha-rotutu/ 

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here