Governu ho Parlamentu Nasionál, kinta be’e halo debate ba Proposta Lei OJE tinan 2022 iha debate faze Jeneralidade iha sala plenária PN, kinta (02/12). Imajen TATOLI/Egas Cristóvão.

DILI, 02 dezembru 2021 (TATOLI)—Parlamentu Nasionál liuhosi Komisaun C trata asuntu Finansa Públika, liuhosi relatóriu proposta Orsamentu Jerál Estadu (OJE) 2022 rekomenda ba Kámara Konta atu halo auditoria ba ezekusaun fundu COVID no Pakote Rekuperasaun Ekonómika (PRE).

“Tuir lei prestaun konta tenke iha maibé ida laiha, nune’e ami presiza hatene tanba Parlamentu mak aprova osan. Ho ida-ne’e, Kámara Konta presiza halo auditória tanba implementasaun balun iha situasaun emerjénsia la tuir regra tan,” Membru Komisaun C, Fernanda Lay, hateten ba Agéncia TATOLI iha Parlamentu Nasionál, kinta ne’e.

Tanba, nia dehan, tuir lei prestaun konta iha ne’ebé uza Orsamentu Jerál Estadu (OJE) tenke presta konta mai Parlamentu la’ós lori dokumentu de’it, nune’e ezije atu aprezenta relatóriu tanba iha inisíu tau osan ba fundu COVID-19 ne’e, ninia ezekusaun foin ezekuta 40%-resin laiha razaun ne’ebé loos.

Parlamentu Nasionál aprova levantamentu dahuluk ho montante millaun $150 no levantamentu daruak $70 hamutuk millaun $220, no mós hetan apoiu parseiru internasionál.

Orsamentu ne’e kompostu hosi orsamentu ba prevensaun no mitigasaun COVID-19 ho montante millaun $149,500, doasaun hosi International Labour Organization (ILO) apoia rihun $748 no medida apoiu ekonómiku no protesaun sosiál millaun $70,000.

Notisia Relevante: Ezekusaun reál OJE 2021 iha inísiu novembru atinje 52%

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here