Enkontru liña ministeriál kona-ba salva guarda patrimóniu kulturál, iha salaun MESSK, iha Colmera, kinta (02/12). Imajen TATOLI/Egas Cristóvão

DILI, 02 dezembru 2021 (TATOLI)—Liña ministeriál realiza enkontru, iha kinta ne’e, atu salva guarda patrimóniu kulturál imóvel hamutuk 300-resin, ne’ebé daudaun hetan ameasa maka’as hosi prosesu dezenvolvimentu nasionál.

Nune’e, liña ministeriál ne’ebé halo enkontru mak hanesan Ministériu Obra Públika (MOP), Ministériu Justisa (MJ), Ministériu Turizmu, Komérsiu no Indústria (MTKI), Sekretaria Estadu Arte no Kultura (SEAK), Sekretaria Estadu Ambiente (SEA) no Sentru Nasionál Chega, Institutu Públiku (CNC, I.P).

Prezidente Komisaun Konsultivu Patrimóniu Kulturál no atuál Diretór Jerál SEAK, Manuel Smith, hateten, enkontru ne’e atu ajuda halo pareser tékniku, rekomendasaun inklui desizaun ruma atu fó ba membru Governu tutela ba área kultura atubele halo klasifikasaun patrimóniu imóvel nu’udar patrimóniu nasionál.

“Ita hatene katak patrimóniu imóvel hanesan uma, fortaleza (benteng), no subar fatin lutadór labele muda ba mai (imóvel), daudaun ne’e hetan ameasa maka’as hosi prosesu dezenvolvimentu tomak. Ne’e duni atu halo planu integradu ba prosesu protesaun no klasifikasaun ba patrimóniu hirak, presiza estabelese komisaun konsultivu ida,” Prezidente Komisaun Konsultivu informa hafoin ramata enkontru iha salaun Ministériu Ensinu Superiór, Siénsia no Kultura (MESSK), Colmera, kinta ne’e.

Notísia relevante: Bainhira Halo Estrada Tenke Koordena Ho SEAK Atu Evita Estragu ba Patrimóniu Kulturál

Inisiativa atividade ne’e maka atu halibur hanoin atu halo hamenus estragu patrimóniu imóvel.

“Maski dalaruma hanoin hirak ne’e tarde, maibé patrimóniu balun presiza salva no tenke proteje. Ita hatene patrimóniu imóvel barak maka ema ba halo fali fahi luhan, toilet, no baku rahun hodi halo uma, maibé laiha buat ida, ohin ita forma ona komisaun atubele halo koordenasaun ba malu hodi tane a’as valór patrimóniu sira,” nia akresenta.

Durante enkontru, komisaun simu informasaun hosi CNC, I.P katak tinan-rua ba kotuk sira identifika sítiu balun hosi tinan 1974 to’o 1992, nune’e SEAK rasik halo identifikasaun no iha enkontru ne’e halo aprezentasaun kona-ba sítiu identifikadu, hodi entidade responsável bele halo intervensaun.

“Patrimóniu imóvel ne’ebé hetan estragu no seidauk tau importánsia maka Hotel Rezende iha Bairro Formosa, ne’ebé tuir informasaun hosi levantamentu tékniku iha baze katak fatin ne’e uluk líder sira uza hodi tuur hamutuk hemu kafé hodi halo diskusaun kona-ba Timór nia futuru, maibé fatin ne’e laiha ema ida mak hanoin atu proteje to’o baku rahun sai u’ut didi’ak,” nia dehan.

Aleinde ne’e, iha edifísiu Matadoru ne’ebé Governu baku rahun hodi harii fali Ministériu Públiku inklui benteng Batugade, ne’ebé Polísia sira la proteje, maibé halo tiha kazerna Polísia migrasaun iha laran.

“Ida-ne’e hatudu katak laiha ona valorizasaun ba patrimóniu imóvel sira, entaun komisaun ne’e forma atu haree ona sasán sira ne’e,” nia dehan.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here