Governu ho Parlamentu Nasional ba Proposta Lei OJE tinan 2022 iha debate faze Jeneralidade, iha sala plenáriu PN, kinta (02/12). Imajen TATOLI/Egas Cristóvão.

DILI, 02 dezembru 2021 (TATOLI)—Primeiru-Ministru, Taur Matan Ruak, hateten Governu esforsu halo tranzisaun modelu orsamentasaun anteriór ba modelu orsamentasaun foun ka orsamentu baze ba progama.

Notísia Relevante: Komisaun C rekomenda pontu importante 16 ba Governu no sia ba PN

“Ita tenke define prinsípiu balun orienta esforsu permite la’o ho hanoin hanesan. Ba ida-ne’e tuir ha’u-nia haree, ita prezisa uza modelu no sistema ida, tanba ne’e ita timor-oan tenke sente katak prosesu ida-ne’e ita nian. Ne’ebé, haree didi’ak dezde 2016 mak iha kintu ka sestu Governu halo esforsu boot atu uza halo tranzisaun modelu orsamentasaun anteriór ba modelu orsamentasaun foun,’’ Promeiru-Ministru hateten iha ambitu diskusaun proposta OJE 2022 iha faze jeneralidade ba loron daruak iha plenária hodi responde ba relatóriu rekomendasaun Komisaun C nian, kinta ne’e.

Xefe Governu ne’e hateten, iha modelu orsamentasaun foun agora ne’e bolu dehan orsamentu ho baze programa ne’ebé konsentra liu-bá iha saida mak ita halo la’ós osan hira mak gasta, tanba ida ne’e mós implika kombinasaun sistema tolu hanesan planeamentu, programasaun no orsamentasaun.

Hanesan nivél planeamentu kurtu, médiu no ba longu prazu, hanesan planeamentu ki’ik Governu hakarak suku sira ho nivél munisípiu no nasionál hodi koloka osan bazea ba objetivu no meta, no rezultadu saida mak atinjie.

Haree didi’ak tranzisaun ida-ne’e defisíl tebes haree esperiénsia nasaun sira seluk, hanesan Austrália lori tinan 20 hodi tama iha sistema ne’e no Portugal hahú 2007 to’o agora seida’uk hotu.

Tanba ne’e, Taur Matan Ruak hateten, hakarak modelu no sistema ida hala’o asaun integradu ho koordenadu espesialista ba área programa orsamentasaun tenke iha.

Agora saida mak Governu ida-ne’e halo, Taur Matan Ruak hatán, nia parte halo kontinua buat ne’ebé hahú iha 2016 liuhosi krize, maibé la para iha dalan kalaran no primeiru vez sistema ida-ne’e uza.

Eis Prezidente Repúblika ne’e akresenta, Governu define buat tolu importante no presiza hadi’a hanesan ida mak mellora elaborasaun orsamentasaun tuir programa no nia progresaun ba orsamentasaun rezultadu, nune’e planeamentu anuál tenke planeamentu pluri-anuál.

“Hatene atu ba ne’ebé tinan 15 ne’ebé mai. Ne’ebé, ita iha planu estratéjiku dezenvolvimentu nasionál agora ajusta daudaun tuir mandatu programa oitavu Governu Konstituisionál nian tenta hadi’a. Nune’e planu asaun anuál bele iha integrasaun ida entre planu no ba longu prazu hasai referénsia hotu planu ba tempu naruk nian hodi bele dezagrega tinan lima governasaun ida-nian, kada tinan ida periódu orsamentasaun,” nia dehan.

Segundu estabelese regra ba despeza no dixiplina orsamentál, nune’e programa ida-ne’e fó dalan, atu ita liu-liu atu tau osan halo saida no tuir fali mak maiór transparénsia.

“Ha’u haree komisaun C husu ida-ne’e no ha’u hatene UPMA iha loron 21 sei halo konferénsia atu kria sistema informátika ida transaparante tantu ba planeamentu no kontrolu, nune’e ami hakarak pasa sistema ne’e ba Parlamentu Nasionál,” nia hatutan.

Papél Parlamentu Nasionál no Kámara Kontas nian importante loos hodi regulariza sistema ne’ebé ita hakarak estabelese no modelu ne’ebé estabelese, tanba se Governu avansa ba orsamentu ho baze programa maibé se ko’alia kona-ba modelu anteriór atu ba ne’ebé.

Tanba ne’e, Xefe Governu ne’e hanoin no Governu nakloke no Parlamentu Nasionál fó apoiu makaas loos, nune’e Governu bele la’o tuir dalan ida di’ak hahú tempu naruk ona.

Xefe Governu mós sujere ba asesór sira tenke ba área orsamentu ho baze ba programa, hodi nune’e bainhira fó asesória di’ak hodi uza liafuan hanesan, se lae Governu ko’alia ida no Parlamentu ko’alia ida.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here