Boxista Mane Layang Juniór 49 kilograma, Rivaldo Ximenes, uza uniforme azul kontra Zelitu F. Guterres, uza uniforme mean, iha kompetisaun aniversáriu El-Matadór ba dala-2. Iha kampu SEJD, kinta (21/10). Imajen Tatoli/Francisco Sony

DILI, 02 dezembru 2021 (TATOLI)– Federasaun Boxe Amadora Timor-Leste (FBATL), planu realiza kompionatu nasionál, iha loron 09 to’o 12 dezembru, hodi prepara boxista timoroan ba kompete iha eventu internasionál 2022.

“Eventu ne’e ita hala’o atu dignifika boxista sira no prepara mós fini boxista nian ba futuru. Tanba iha tinan oin (2022), ita mós sei ba partisipa iha Sea Games, entaun eventu ne’e dalan ida atu ita halo selesaun ba boxista sira ne’ebé di’ak bele partisipa tantu hosi senior no mós junior,” Prezidente Komisaun Organizadora ba eventu kampionatu nasionál, Mateus Soares, hateten ba jornalista-sira iha Benfica-Colmera, kinta ne’e.

Prezidente Komisaun organizador, Mateus Soares ho nia membru sira ne’ebé sei organiza kampionatu nasionál FBATL. Imajen/Hortencio Sanchez

Eventu nasionál  ne’e sei partisipa hosi klube hamutuk 24 no asosiasaun 10 ne’ebé mak rejista ona iha FBATL hanesan membru.

Daudaun, FBATL loke ona rejistu ba klube no asosiasaun-sira ne’ebé hakarak rejista-nia atleta atubele partisipa eventu ne’e.

FBATL realiza eventu ne’e tanba hetan apoia fundu hosi Governu liuhosi Sekretariu Estadu Juventude no Desportu (SEJD) hamutuk $18.000-resin.

“Ita sei fó premiu ba boxista primeiru lugar ho osan hamutuk $250, segundu lugar $200 no terseiru lugar $100,” nia informa.

Eventu ne’e, nakloke ba públiku atubele partisipa, maibé presiza sosa tikete kada ema ho folin $1 no eventu ne’e sei hala’o iha resintu SEJD, Lecidere.

Notísia Relevante: El-Matador realiza eventu “Mini Tournament Boxe”

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here