Estudante Ensinu Sekundáriu Jerál Katóliku Santo Estevão Viqueque. Imajen TATOLI/Vitorino Lopes da Costa

VIQUEQUE, 02 dezembru 2021 (TATOLI)—Estudante hamutuk na’in-111 hosi Ensinu Sekundáriu Jerál Katóliku Santo Estevão Viqueque preparadu tuir ezame, ne’ebé sei realiza iha loron 13 to’o 17 dezembru 2021.

“Ami forma komisaun iha semana kotuk hodi prepara estudante sira hamutuk na’in-111 atu ba partisipa ezame nasionál,” Diretór Ensinu Sekundáriu Jerál Katóliku Santo Estevão, Martinho Amaral, hateten, iha ninia knaar fatin, rua Don Jeremias, kinta ne’e.

Notísia relevante: Estudante na’in-3.583 preparadu ba ezame nasionál iha Viqueque

Matéria ezame nasionál 60% akumula hosi 10o ano, matéria 20% akumula hosi 11o ano no matéria 20% akumula hosi 12o ano.

“Tanba ne’e, profesór sira halo fali review ba matéria hodi estudante sira bele estuda. Nune’e, ekipa komisaun hosi eskola, daudaun prepara hela meza no kadeira ba estudante sira uza ba ezame,” nia akresenta.

Pontu ezame nasionál iha rua, ezame nasionál no ezame lokál, ne’ebé profesór sira prepara hotu ona pontu ezame, ne’ebé hosi eskola privadu ne’e, iha estudante hosi siénsia teknolojia hamutuk na’in-87 no siénsia sosiál na’in-24 mak sei partisipa ezame nasionál.

“Profesór sira hahú fahe númeru ezame nasionál iha loron 10 dezembru, ba estudante sira hodi partisipa ezame nasionál, ne’ebé kritériu atu liu ezame nasionál maka tenke hetan valór ba kada matéria ida, neen ba leten ho totál valór mínima 35 ba leten mak foin liu ezame nasionál,” nia dehan.

Nune’e, nia husu ba estudante Santo Estevão ne’ebé atu partisipa ezame nasionál tenke prepara-an estuda no kuidadu saúde atu labele hetan moras.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here