CNE halo edukasaun sÍvika ba estudante sira iha munisípiu Bobonaro. Imajen Tatoli/Sérgio da Cruz.

BOBONARO, 02 dezembru 2021 (TATOLI) – Komisaun Nasionál Eleisaun (CNE sigla portugés) munisípiu Bobonaro hala’o edukasaun sívika ba estudante sekundária jerál Dom Martinho da Costa Lopes no Eskola Tékniku Vokasionál Malibaca, postu administrativu Maliana, munisípiu Bobonaro.

Diseminasaun informasaun hosi CNE ba estudante sira kona-ba “promove esklaresimentu aktu eleitorál no eleisaun reziliente ho Covid-19”.

Vise-Prezidenti CNE, José Barreto, esplika, atividade edukasaun sívika nu’udar faze ikus nian realiza ba estudante sira atu divulga informasaun kona-ba lei ligadu ho lei eleisaun prezidensiál no lei rensensiamentu eleitorál hodi prepara ba eleisaun tinan oin.

“Ami mai halo edukasaun sívika ida-ne’e ho objetivu eleva koñesimentu sidadaun sira, liuliu estudante sira-ne’ebé idade to’o ona 17, atu ita-boot sira uza direitu hanesan hodi ezerse imi-nia direitu ho loloos,” nia ko’alia iha Salaun PDHJ Unidade Territoriál Bobonaro, kinta ne’e.

Iha opurtunidade ne’e, CNE mós esplika kona-ba alterasaun lei resensiamentu eleitoral ne’ebé haktuir katak bainhira sidadaun hotu atu ba rejistu hetan kartaun eleitorál presiza de’it dukumentu tolu hansan Billete Identidade (BI), sertidaun batizmu no pasaporte ne’ebé tempu badak CNE sei aplika.

Nia husu estudante sira habelar informasaun ne’e iha sosiedade nune’e sidadaun sira seluk bele hetan informasaun kona-ba trata ka asesu ba kartaun eleitorál ne’e.

Biban ne’e, Diretór Sekretariadu Tékniku Administrasaun Eleitorál (STAE) Munisípiu Bobonaro, Mariano Viegas Amaral, husu ba estudante sira-ne’ebé seidauk iha kartaun eleitorál atu ba trata lalais iha fatin ne’ebé STAE prepara.

“STAE agora halo hela resensiamentu eleitorál iha sede STAE no postu administrativu sira, ne’e alin sira fila karik, dehan ba sira seluk bele mai trata eleitorál, ami sei atende imi to’o janeiru tinan oin,” nia katak.

Entretantu, Komandante PNTL Munisípiu Bobonaro, Superintendente Antoninho Mauluta, enkoraja estudante sira atu uza oportunidade ne’e rona informasaun ho di’ak nune’e bele ba vota ho di’ak, responsablidade no pás hanesan ema sidadaun Timór-oan iha eleisaun 2022.

“Alin sira iha direitu atu tuir kampaña iha tempu tuir mai, tanba ne’e tenke prepara an didi’ak atu ba vota, tanba ita-nia lei kódigu prosesu penál iha artigu 229 to’o 240 regula,” nia esplika.

Iha fatin hanesan, estudante Tékniku Vokasionál Malibaca, Yamato, Maliana, Donasio de Fasio Afonso Sarmento, konsidera programa ne’e importante tebes tanba bele eleva koñesimentu kona-ba lala’ok eleisaun.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here