Entidade autoridade munisIpál partisipa sensibilizasaun Lei Kódigu Mineiru iha Baucau, kinta (02/12). Imajen Tatoli Tatoli/ Natalino Belo.

BAUCAU, 02 dezembru 2021 (TATOLI) – Autoridade Nasionál Petróleu no Minerál (ANPM) sensibiliza Lei Númeru 12/2021 fulan-juñu kona-ba Kódigu Mineiru ba autoridade iha munisípiu Baukau.

Prezidente ANPM, Florentino Soares Ferreira, esplika, lei refere fó vantajen ba Timor-Leste, tanba regulariza rikeza hanesan metalika iha ona planu atu realiza, maibé sei integra hotu ba lei ne’e rasik.

“Ita-nia Lei Kódigu Mineiru nian ohin ita disemina iha Baukau, klaru iha munisípiu sira seluk mós ita halo diseminasaun, maibé nia abertura hahú iha Baukau,” Prezidente AMPN ko’alia iha Salaun Konvensaun Baucau, Vila Antiga, kinta ne’e.

ANPM halo ona estudu levantamentu jeofízika uza aviaun leno rekursu sira iha rai-okos dezde 2017 no estudu ne’e atinje ona 90% tanba emprezáriu hosi estranjeiru hein hela hakarak halo investimentu iha área minerál maibé lei refere tenke entrada vigór.

ANPM mós halo ona estudu impaktu ambientál ne’ebé mak forte atu prevene ambientál no mós sosiedade.

Hafoin fo sai-hosi Jornál Repúblika, presiza loron180 atu tama ba vigór nune’e iha ámbitu ne’e realiza diseminasaun iha territóriu nasionál atu fó hanoin ba entidade hotu kona-ba regulamentu empreza sira bainhira halo investimentu iha Timor-Leste.

Sekrétariu Jerál Konsellu Munisipál Kombatente Libertasaun Nasionál Baucau, Manuel ‘Alari’ da Costa Soares konsidera lei refere hanesan lei osan-mean tanba konsellu veteranu rasik iha interesse hakarak hola parte iha investimentu.

“Lei ida-ne’e loke ona espasu ba veteranu atu hanoin, oinsá lema ne’ebé dehan katak na’in no riin ne’e bele sai realidade tanba bele ona partisipa,” Alari argumenta.

Lei Kódigu Mineiru rasik fó-sai iha Jornál Repúblika iha loron 30 juñu 2021 hafoin Parlamentu Nasionál aprova Lei númeru 12/2021 iha loron 30 juñu.

Lei refere bazea ba Konstitusaun Repúblika Demokratika Timor-Leste artigu 95 númeru 1 no artigu 139.

Lei Kódigu Mineiru hamutuk artigu 162, kapítulu 20 no anexu 3. Artigu 1 defini aprovasaun kódigu mineiru, artigu 2 define polítika mineiru no artigu 3 define objetivu sira kona-ba estratéjia setór mineiru nian no ikus liu artigu 162 define kona-ba dispozisaun transzitória.

Notísia relevante: PN aprova projetu-lei kódigu mineiru ho unanimidade  

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here