Treinadór klube primeira Divizaun Aitana FC, Octavio da Costa Alves. Imajen/ Hortencio Sanchez

DILI, 02 dezembru 2021 (TATOLI)– Treinadór klube primeira divizaun Aitana FC, Octavio da Costa Alves, hateten, Aitana preparadu hodi hasoru Lalenok United FC iha jogu Liga Futeból Timor-Leste (LFTL) iha jornada da-tolu ne’ebé sei akontese iha aban (03/12), tuku 16:00 loraik iha Estádiu Munisipál Dili.

“Jogu ida aban ne’e importante loos mai ami. Ami tenke joga hakas an atubele manán Lalenok atu hetan pontu tolu tanba iha jogu rua liu ona ami lakon dala ida no empate ida, ne’ebé tenke hakas an makas iha jogu aban,” Treinadór Octavio, hateten ba jornalista-sira iha edifisiu LFTL, Dili, kinta ne’e.

Notísia Relevante: Ponta Leste manán Lalenok 1-0

Iha jogu dahuluk, Aitana kontra Ponta Leste, maibé derrota 0-1 no jogu daruak kontra SLB ho empate 0-0, nune’e Aitana hela ho pontu ida iha tabele klasifikasaun provizóriu.

“Iha jogu sira liuba la konsege gaña vitória tanba falla iha liña klaran ne’ebé konsege hadi’a ona fallansu hirak ne’e no jogu aban sei hetan vitória,” nia garante.

Iha fatin biban hanesan, Treinadór Lalenok FC, Gaspar Amaral, hateten, Lalenok mós preparadu hasoru Aitana.

Treinadór Lalenok FC, Gaspar Amaral. Imajen/ Hortencio Sanchez.

“Jogu aban ne’e importante loos ba ami tanba ami mós foin iha jogu segundu ne’e lakon ho Ponta Leste, entaun hasoru Aitana ami, tenke esforsu hodi manán. Ha’u orienta ona jogadór sira atu hatudu jogu ne’ebé di’ak hodi rekupera derrota ida foin lalais ne’e,” Gaspar dehan .

Lalenok nia difikuldade mak jogadór na’in-lima reforsa hela selesaun nasionál ba joga iha AFF Suzuki Cup 2021 iha Singapura.

Nune’e, nia konsidera la fó vantajen di’ak ba Lalenok rekolla pontu tolu, maibé nafatin iha esperansa ba liga époka ne’e.

Jogadór na’in lima mak hanesan Paulo Gally iha pozisaun avansadu, Elias Mesquita avansadu, Gumario Morreira hanesan defeza no Julião Mendonça hanesan defeza.

Daudaun, klube ne’ebé sei lidera provizóriu tabela klasifikasaun, hanesan klube Karketu Dili FC ho pontu hitu, segundu AS Ponta Leste pontu neen, AD SLB Laulara pontu haat, Lalenok pontu tolu, Aitana pontu ida no DIT ikus liu ho pontu mamuk.

Notísia Relevante: FC Aitana kontrata jogadór estranjeiru na’in-haat

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here