Sekretáriu Estadu Formasaun Profisionál no Empregu (SEFOPE), Alarico do Rosário, ensera ona formasaun movel iha munisípiu Covalima. Imajen/Espesiál.

DILI, 01 dezembru 2021 (TATOLI)—Sekretáriu Estadu Formasaun Profisionál no Empregu (SEFOPE), Alarico do Rosário, ensera ona formasaun movel iha munisípiu Covalima iha 25 novembru 2021.

Notísia Relevante: STVJ Comoro finaliza ona formasaun movel iha Covalima

“Iha semana kotuk, Sekretáriu Estadu komesa ensera ona formasaun movel iha Covalima ba partisipante hamutuk na’in-28,” Diretór Sentru Treinamentu Vokasionál Juventude (STVJ) Comoro, Norberto da Costa, hateten ba Agência Tatoli, iha nia knaar-fatin, Comoro, Díli, kuarta ne’e..

Sekretáriu Estadu ne’e enkoraja no dezafia partisipante sira atu lalika simu sertifikadu no para de’it ho buat ne’ebé sira aprende, maibé buka no kontinua implementa nafatin saida mak sira aprende, tanba poténsia turizmu la’ós ohin de’it maibé ba oin nafatin.

Sekretáriu Estadu Formasaun Profisionál no Empregu (SEFOPE), Alarico do Rosário, ensera ona formasaun movel iha munisípiu Covalima. Imajen/Espesiál.

Iha formasaun movel ne’e, partisipante hamutuk na’in-30 maibé iha partisipante na’in-rua la kompetente, tanba momentu ne’ebá familia mate, entaun sira labele kontinua formasaun no partisipante na’in-28 mak konsege finaliza no simu sertifikadu.

Diretór ne’e informa, durante formasaun ne’e partisipante sira iha interrese tebes, nune’e bukae ne’ebé sira hetan liuhosi formasaun ne’e balun implementa ona sira-nia atividade negósiu no balun mak seidauk bele implementa.

“Hanesan, partisipante balun ne’ebé implementa sira dehan iha vantajen no benefisiu di’ak ba sira-nia negósiu, tanba kliente balun komesa tun ba iha sira-nia baraka no sira oferese produtu ne’ebé sira aprende durante iha formasaun,” nia dehan.

Hosi ne’e, STVJ Comoro hakarak kontinua atu dezenvolve tan formasaun iha área sira seluk hanesan oinsá atu halo prosesamentu ai-han lokál ba partisipante sira, maibé depende hosi oportunidade mós.

“Iha momentu ne’ebá, SEFOPE mós husu ba sira (partisipante) katak sei la taka matan bainhira iha oportunidade tuir mai, maibé importante mak sira implementa no hetan rezultadu ne’ebé di’ak no SEFOPE sei tau matan nafatin,” nia dehan.

Iha serimónia enseramentu ne’e partisipa hosi Sekretáriu Estadu Formasaun Profisionál no Empregu (SEFOPE), Alarico do Rosário, Diretór Jerál SEFOPE, Paul Alves, Xefe Departamentu Dirasaun Nasionál Formasaun Profisionál no Asesor Nasionál iha Dirasaun Nasionál Formasaun Profisionál.

Aleinde ne’e, iha serimónia enseramentu ne’e SEFOPE distribui mós sertifikadu ba partisipante sira no STVJ Comoro entrega mós ekipamentu negósiu nian hanesan kopu no vandeiza ba partisipante sira atu nune’e sira bele uza iha sira-nia atividade negósiu nian.

Entretantu, formasaun ne’e realiza tanba STVJ Comoro hetan apoia hosi Sekretaria Estadu Formasaun Profisionál no Empregu (SEFOPE) hamutuk $23,220.00 hodi bele realiza formasaun movel ba área hospitalidade iha munisípiu Covalima.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here