Ekipa Sekretaria Estadu ambiente (SEA) liuhosi National Dezigneted Autority (NDA) realiza semináriu ba entidade iha munisípiu Baucau, kuarta (01/12). Imajen Tatoli/Natalino Belo.

BAUCAU, 01 novembru 2021 (TATOLI) – Governu liuhosi Sekretaria Estadu Ambiente (SEA) realiza semináriu ba entidade iha Baucau atu fasilita asesu fundu klimátika verde hosi Organizasaun Nasaun Unida (ONU).

Sekretáriu Estadu Ambiente, Demétrio do Amaral de Carvalho Amaral, esplika, semináriu ne’e realiza hosi Autoridade Nasionál Dezignada ka National Dezigneted Autority (NDA) ne’ebé establese iha VIII Governu Konstitusional hodi halo-tuir obrigasaun Konvensaun Nasaun Unida ba operasaun klimátika ne’ebé hamosu kondisaun sira atu asesu ba fundu klimátika verde.

“Espera iha semináriu ida-ne’e bele ajuda entidade sira iha Baucau nia interese atubele asesu ba fundu sira-ne’ebé Nasaun Unida atu atribui ba fundu klimátika,” Governante ne’e ko’alia iha Sentru Konvensaun Baucau (CCB, sigla Portugés) Vila Antiga, kuarta ne’e.

NDA rasik nu’udar autoridade ne’ebé halo ligasaun entre governu Timor-Leste ho fundu klimátika verde ne’ebé ho papél importante atu promove mekanismu dezenvolvementu verde.

Semináriu ida-ne’e ho intensaun halo sensibilizasaun kona-ba oinsá mak parte sira hosi Timor-Leste bele nakfilak sai ajénsia akreditadu ka iha ponténsia iha futuru sai hanesan ajénsia implementardór ba projetu sira-ne’ebé finansia hosi fundu klimátika verde,” Demétrio akresenta.

SEA liuhosi NDA organiza semináriu refere atu pronunsia katak iha tinan tolu nia laran Timor-Leste bele mobiliza biliaun $ 55 hosi fundu klimtáika verde ba projetu boot tolu hanesan rezidénsia infraestrutura rurál, zona bee ne’ebé Japan International Cooperation Agency (JICA) no Ministériu Agrikultura no Peska (MAP) mak implementa no hasa’e sistema alerta sedu iha Timor-Leste ho valór millaun $21.

Dadaun-ne’e iha projetu rezidénsia infraestrutura rúral mak hala’o hela iha munisípiu neen (6) mak hanesan Lautém, Viqueque, Baucau, Aileu, Ermera no Liquiçá no kada munisípiu iha projetu 19 to’o 26.

Projetu refere iha faze tinan daruak nian sei hahú iha tinan 2022 nune’e espera Timor-Leste bele sai benefisiáriu ba projetu hirak-ne’e.

Totál orsamentu ne’ebé aloka hosi fundu klimátika verde hamutuk billaun $22.4 no finansia hosi Governu Timor-Leste liuhosi MAP, Programa Nasionál Dezenvolvementu Suku (PNDS) inklui liña ministeriál relevante seluk ne’ebé hamutuk millaun $33.3.

Reprezentante Grupu Juventude Hadomi Ambiente (JAHA), Domingos Freitas, konsidera semináriu refere importante tebes tanba munisípiu Baucau tama iha degradasaun ambientál, nune’e persiza implementa programa hosi SEA oinsá bele rekupera ambiente.

“Ita-nia munisípiu agora daudaun tama iha degradasaun, tanba ne’e ha’u husu atu tau osan boot mai ita-nia postu administrativu tanba relasiona ho ema tesi estraga ai,” Domingos propoin.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here