Funsionáriu SAMES alista hela ekipamentu saúde, iha armazen SAMES, segunda (15/11). Imajen Tatoli/Francisco Sony

DILI, 01 novembru 2021 (TATOLI)— Diretór Ezekutivu, Servisu Autónomu Medikamentu no Ekipamentu Saúde (SAMES), Santana Martins, husu ba fasilidade saúde liuliu postu no sentru saúde sira ne’ebé estoke aimoruk menus bele hato’o pedidu atubele distribui.

“Ami husu ba fasilidade saúde sira iha munisípiu-sira bainhira haree estoke medikamentu menus tenke halo pedidu mai atu nune’e bele distribui tanba aimoruk ita sosa tiha, maibé la uza,” Santa Martins, hatete ba Agência TATOLI iha knar fatin, Kampu-alor-Dili, kuarta ne’e.

SAMES mós komunika ona ba munisípiu sira no indetifika balun estoke medikamentu laiha menus ona, maibé la halo pedidu distribuisaun.

Nune’e, SAMES rekomenda ba munisípiu sira katak aimoruk menus ona 10% husu hato’o pedidu mai nasionál atubele prosesa lalais no distribui hodi fó atendimentu di’ak ba sidadaun sira.

“Haree menus tenke halo pedidu mai lalais tanba estoke ai-moruk iha armazein SAMES rejionál no Nasionál sufisiente atu distribui. La’ós hein to’o mamuk mak alerta fali ba publiku dehan aimoruk laiha ne’e ladi’ak,’’ Diretór Ezekutivu ne’e rekoemnda.

Iha fatin ketak, Xefe Sentru Saúde, Ermera vila, Manuel Soares, informa daudaun aimoruk esensiál sira iha sentru saúde Ermera villa sufiente hela.

‘’Aimoruk esensiál sira hanesan paracetamol, aimoruk ba inan isin-rua, ba moras tensaun nian sei sufisente hela. Se karik laiha mak halo pedidu ba serbisu saúde munisípu Ermera hodi kontinua ba nasionál ka SAMES atu transporta mai,” nia informa.

Entretantu, Diretór Servisu Saúde Munisípiu Aileu, Júlio dos Santos, informa aimoruk esensiál liuliu paracetamol estoke hahú menus tanba bainhira vasina ba komunidade fahe mós aimoruk ba sira , maibé ba medikamentu seluk provizóriu sei sufiente hela.

“Ema nia asesu ba vasina ne’e barak entaun tenke hetan paracetamol ne’ebé iha ne’e landun sufisiente no ami hahú prepara atu pedidu atu lori ba SAMES,” nia akresenta.

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here