Agrikultór sira iha Atabae, munisípiu Bobonaro, kolleta hare Nakroma éepoka daruak tinan 2021. Imajen Tatoli/Sérgio da Cruz.

BOBONARO, 01 dezembru 2021 (TATOLI) – Produsaun hare iha suku Aidabaleten no suku Rairobu, postu administrativu Atabae, munisípiu Bobonaro époka daruak nian tinan 2021 nian menus tanba estraga hosi peste.

Agrikultora Maria da Conceiçao, informa, iha semana kotuk maioria agrikultór sira idak-idak kolleta hare maibé falla iha produsaun kompara ho tinan kotuk tamba kauza hosi ameasa pesti ‘Nago’.

“Ha’u-nia hare ne’e ektare ida de’it, iha tinan kotuk kuda daruak nian ne’e ami hetan karón 60, maibé tinan ida-ne’e menus tanba hare ne’e Nago haan aat hotu kedas, balun ami tesi mai isin laiha soe fali de’it,” Agrikultora Maria da Conceição, informa ba Agência Tatoli, iha natar Atabae, kuarta ne’e.

Nia haktuir, atakasaun peste Nago ne’e akontese kedas iha fulan-rua ba kotuk bainhira hare isin foin mosu, no momentu ne’eba kedas agrikultór sira komesa uza ai-moruk halo intervensaun ba tipu hare Nakroma no Membramo maibé la konsege salva.

Agrikultora ne’e hateten, hosi rezultadu ne’e halo natar na’in sira balu kontinua kolleta no balu soe esreaga de’it tanba hare isin laiha, ho nune’e difikulta agrikultór sira atu ba tetu iha kompañia lokál sira-nia armazein.

“Ha’u sente triste tanba ami lakon osan barak, aluga tratór selu $50 dolar depois selu tán ema kuda ne’e na’in ida ita selu $5 dolar, maibé ida-ne’e ita atu halo-nusá tán simu de’it ona, naran ko’a de’it ona atu ba fa’an bele hetan fali osan inan ne’e mós la buat ida,” nia afirma.

Nia husu Ministériu Agrikultura no Peska (MAP) atu apoia ai-moruk ba prevensaun pesti ne’e nune’e tinan oin labele akontese tán.

Entretantu, Agrikultór Jenevio Bebeto Cardoso, husu ba Governu atu hasa’e folin hare-kulit iha merkadu nasionál to’o munisípiu tanba presu atuál sufisiente ba sira.

“Bainbain Sentru Lojístika Nasionál haruka kompañia Leohora mai tetu kilo ida $0,45 sentavu de’it. Ida-ne’e ami sente la to’o mai ami, tanba kustu ida ami hasai durante prosesu kuda to’o kolleta ne’e osan bootliu, sé bele hasa’e tán oituan ba $0,55 sentavu atu ami mós bele badinas nafatin,” nia husu.

Agrikultór Jenevio Bebeto Cardoso husu Governu atu apoia tratór ba agrikultór sira fila-rai, nune’e bele motiva agrikultór sira badinas halai natar hodi hasae kuantidade produsaun ra- laran.

Tuir observasaun Agência Tatoli iha terrenu nota katak, alende ameasa hosi pesti Nago, hare balu mós bokon tanba kauza hosi udan boot nune’e halo agrikultór sira ko’a hare iha de’it tahu laran.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here