COVID-19 variante foun Omicron. Imajen/Espesiál.

DILI, 01 dezembru 2021 (TATOLI)—Komisaun F trata asuntu Saúde, Seguransa Sosiál no Igualidade Jéneru, husu Governu liuhosi Ministéiru Saúde atu aplika regra kontrolu rigorozu iha pontu entrada terreste no aeroportu ba prevensaun COVID-19 variante foun hanaran Omicron.

“Daudaun ne’e ita rona COVID-19 variante foun Omicron iha mundu hanesan iha Indonézia, nune’e husu Governu presiza hakaas nafatin halo kontrolu ida másimu hodi labele fó fatin ba virus variante foun tama liu-liu ema sira ne’ebé liu pontu entrada tenke halo konfinametu obrigatóriu tuir regra protokolu saúde nian,’’ Prezidente Komisaun F, Noé da Silva ‘Buka Tuir’, hateten ba Agéncia TATOLi iha Parlamentu Nasionál, kuarta ne’e.

Importante mós Ministéiru Saúde tenke habelar nafatin informasaun sira kona-ba COVID-19 ba populasaun sira kona-ba regra prevensaun sira hanesan fase liman, uza máskara, distánsiamentu fíziku no sosiál.

Deputadu ne’e husu mós ba sidadaun ne’ebé seida’uk vasina atu nafatin hakbesik an ba sentru vasinasaun sira iha postu saúde no klinika sira hodi bele simu vasina atu aumenta ema ida-idak nia imunidade luta hasoru COVID-19.

Prezidente Komisaun F, ne’e hateten preparasaun Governu no Parlamentu Nasionál atu hasoru COVID-19 di’ak entermu haree ba alterasaun lei Sistema Saúde ne’ebé hetan ona aprovasaun hodi fó dalan ba parte relevante hodi atua situasaun saúde públika di’ak liután.

COVID-19 variante foun OMICRON da’et lalais

Variante foun Omicron 500% da’et lalais liu. Variante foun B.1.1.529 Omicron iha poténsia sai problema boot la’ós iha de’it Afrika maibé ba mundu tomak.

Ninia sintoma ne’e kmaan, velosidade hada’et ne’e mak atinje maizumanus 500% kompara hos virus corona SARS-CoV-2 ne’ebé ninia orijin ba dahuluk deskobre iha Wuhan, Xina, iha tinan 2019 liu ba ne’e.

Tanba ne’e, Organizasaun Mundiál Saúde (OMS) halo ona klasifikasaun variante foun OMICRON ne’e tama iha kategoria variant variant of concern (VoC), la liuhosi kategoria variant of interest (VoI).

Jornalista: Nelson de Sousa

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here