Vise Ministru Negósiu Estranjeiru no Kooperasaun (MNEK), Julião da Silva ho Embaixadór Japaun iha Timor-Leste, Masami Kinefuchi, selebra akordu kooperasaun ba dala-haat projetu Human Resoures Development Scholarship (JDS). Imajen/Egas Cristovão.

DILI, 01 dezembru 2021 (TATOLI) – Governu Timor-Leste liuhosi Ministeriu Negósiu Estranjeiru no Kooperasaun (MNEK), reprezenta hosi Vise Ministru, Julião da Silva ho Embaixadór Japaun iha Timor-Leste, Masami Kinefuchi,  selebra akordu kooperasaun ba dala-haat kona-ba projetu Human Resoures Development Scholarship (JDS) atu bele fasilita timór-oan ba eskola iha Japaun.

“Ita asina kooperasaun ho Governu Japaun kona-ba kapasitasaun rekursu umanu liuliu fó bolsa estudu ba timór-oan-sira atu ba eskola iha Japaun. Kooperasaun ne’e hahú iha 2018, ne’ebé kuaze etapa dala-haat ona haruka ita nia ema ba eskola iha ne’eba hasai kursu masteradu iha área hanesan edukasaun, infraestrutura, enjeneria no seluk tan,” Vise Ministru Julião hateten ba Agência TATOLI iha edifisiu MNEK-Praia kokeirus-Dili, kuarta ne’e.

Vise Ministru Negósiu Estranjeiru no Kooperasaun (MNEK), Julião da Silva. Imajen/Egas Cristovão.

Akordu ne’e importante tebes ba Timor-Leste tanba atu adere ba Association of Southeast Asian Nations (ASEAN) presiza rekursu umanu ne’ebé sufisiente no iha kualidade.

Nune’e, Governante ne’e, kongratula no agradese ba Governu Japaun ne’ebé ho kompromisu atu apoia prosesu dezenvolvimentu iha área hotu-hotu.

“Ita agradese ba Governu Japaun ne’ebé fó tulun ona mai ita liu hosi JICA,” Governante ne’e agradese.

Iha  biban hanesan, Embaixadór Japaun iha Timor-Leste, Masami Kinefuchi, hateten Governu Japaun iha kompromisu atu kontinua suporta dezenvolvimentu liuliu kapasitasaun rekursu umanu no setór seluk.

“Dezenvolvimentu rekursu umanu mak xave ba harii nasaun, nune’e Japaun oferese bolsa estudu barak ba timór-oan na’in 2.000-resin bá estuda ona iha Japaun,  hahú hosi independensia to’o agora,” Embaixadór Japaun ne’e kompromete.

Akordu JDS ne’ebé asina atu fó oportunidade ba ofisiál foinsae-sira hodi prepara an ba lidera nasaun ne’e iha futuru.

Embaixadór Japaun iha Timor-Leste, Masami Kinefuchi. Imajen/ Egas Cristovão

“Objetivu hosi projetu JDS atu suporta dezenvolvimentu rekursu umanu foka liu ba funsionáriu foinsae-sira hodi sai lideransa iha futuru no atu hametin parseria entre nasaun rua,” Diplomata Japaun ne’e akresenta.

Programa JDS ne’e komesa iha hosi tinan 2018 ne’ebé funsionáriu na’in-23, hosi númeru ne’e na’in-neen kompleta ona estudu iha nivel mestradu no daudaun na’in-18 mak kontinua estudu iha Japaun.

Liuhosi nota ne’ebé mak asina ona funsionáriu na’in-ualu mak sei sai benefisiariu no selesionadu hodi ba hala’o-sira nia estudu iha Japaun iha tinan oin (2022) iha área administrasaun públika, sistema legál, saúde, edukasaun, transporte no dezenvolvimentu ambientál.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here