Autoridade munisipál iha Covalima tuir formasaun kona-ba matadalan PDIM. Imajen Tatoli/Celestina Teles.

COVALIMA, 01 dezembru 2021 (TATOLI)—Ministériu Administrasaun Estatal (MAE) liuhosi Dirasaun Jerál Dezenvolvimentu Ruràl (DGDR) fó formasaun kona-bá matadalan aprovizionamentu Planu Dezenvolvimentu Integradu Munisipál (PDIM) ba autoridade sira iha munisípiu Covalima. 

Notísia Relevante: Projetu PDIM Covalima prioridade konstrui rezidénsia administradór-edifisiu PA

Asesor PDIM MAE, Jacob da Cruz Gouveia Leite, hateten formasaun ne’e MAE hala’o hodi fahe matéria rejime jurídiku ba autoridade munisipál no autoridade lokál sira tanba programa PDIM na’in mak hosi munisípiu.

Entaun, nia dehan, bainhira sira atu implementa tenke hatene rejimentu ne’ebè mak iha ligadu ho dekretu-lei númeru 15/2016, ne’ebé ko’alia kona-ba rejimentu Planu Dezenvolvimentu Integradu Munisipál (PDIM) nian. 

“Ami halo observasaun nomós fó nafatin asisténsia ba servisu munisípiu iha aprovizionamentu. Ami-nia koordenasaun di’ak entaun munisípiu implementa projetu PDIM bazea ba matadalan no bainhara hasoru difikuldade sempre kontaktu ami,” Jacob da Cruz Gouveia Leite hateten ba jornalista sira iha Salaun Família Resto, kuarta ne’e. 

Tanba, tuir nia, durante ne’e bainhira munisípiu sira hasoru difikuldade sempre koordena ho Ministériu Administrasaun Estatál (MAE) kona-ba implementa projetu PIDM. 

Reprezenta Administradór Munisípiu Covalima, Afonso Nogueira Nahak reforsa, ho formasaun ne’e bele implementa projetu PDIM bazea ba matadalan.

“Ohin ho aban ita tuir formasaun kona-ba matadalan PDIM nian no prosesu iha munisípiu tenke la’o tuir regra MAE nian, ho nia ekipa fahe informasaun kona-ba matadalan aprovizionamentu nian,” nia hateten. 

Ho formasaun ne’e bele implementa programa bazea ba matadalan ne’ebè mak regula ona, no formasaun refere partisipa hosi diretór munisípál, xefe departamentu sira no administradór sira.

Enkuantu projetu PDIM ba tinan 2021, Covalima seidauk implementa projetu ne’e mak konstrusaun rezidensia administradór no edifísiu administrasaun Postu Administrativu Maucatar.

Iha OJE 2022, Administrasaun Munisipál Covalima hetan alokasaun orsamentu ba programa PDIM hamutuk rihun $353,6. Hosi totál ne’e, rihun $424.4 finansia ba projetu reapropriasaun ne’en (6).

Administrasaun Munisipál Covalima hetan despeza husi Orsamentu Jeral Estadu 2022 hamutuk tokon $3.8. Orsamentu hirak ne’e aloka tuir liña orsamentu servisu sektorál no Sekretariadu Administrasaun Munisipál nian.

Hosi totál orsamentu akumuladu ona kustu ba merenda eskolár, alfab4tizasaun, konsensoen eskolár $948.7 no ba projetu reapropriasaun PDIM rihun $353.6.

Jornalista : Celestina Teles

Editor      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here