Primeiru-Ministru, Taur Matan Ruak, hamutuk ho membru Governu sira partisipa iha debate Jeneralidade ba Proposta Lei OJE 2022, iha sala plenária PN, kuarta (01/12). Imajen TATOLI/Egas Cristóvão

DILI, 01 dezembru 2021 (TATOLI)—Governu propoin aumentu iha investimentu públiku Proposta Lei Orsamentu Jerál Estadu (OJE) 2022, ne’ebé destaka ba área neen.

“Kapitál Sosiál ami propoin millaun $226,5 ne’ebé reprezenta 13,5% hosi OJE atu aposta ba edukasaun, formasaun profisionál no saúde, hodi kualifika traballadór sira iha setór xave ekonomia no ba serbisu esensiál sira hodi responde ba nesesidade Administrasaun Públika no setór privadu, no haforsa resposta ba pandemia COVID-19 no fó kontinuidade ba programa vasinasaun,” Primeiru-Ministru (PM), Taur Matan Ruak, hateten, iha ámbitu debate OJE 2022 iha faze jeneralidade, iha sala plenaria, Parlamentu Nasionál (PN), kuarta ne’e.

Notísia relevante: OJE 2022 akumula millaun $150 hosi reseita doméstika

Enkuantu, ba Abitasaun no Inkluzaun Sosiál, Governu propoin millaun $387,3 ka 23,1% hosi OJE hodi kontinua aposta ba melloramentu asesu bee-mós, saneamentu báziku no eletrisidade iha territóriu laran tomak inklui dezenvolvimentu programa abitasaun asesível.

Setór Produtivu sira, Ambiente no Konektividade, propoin millaun $345,9, ne’ebé reprezenta 20,7% hosi OJE, atu aumenta produtividade agríkola no seguransa ba ai-han, konstrui infraestrutura foun, kanál distribuisaun no estrutura armazenamentu agríkola hodi dezenvolve indústria otelaria nia liuhosi formasaun profisionál hosi setór ne’e no estimula komportamentu ne’ebé sustentável liu ba populasaun, ho redusaun ba utilizasaun materiál la’ós bioagradável no aumentu prátika ba resiklajen no reutilizasaun materiál sira hodi aumenta reziliénsia país ba alterasaun klimátika sira.

Dezenvolvimentu Setór Privadu, ezekutivu sira propoin millaun $78,6 ne’ebé reprezenta 4,7% hosi OJE, tanba Governu hakarak aposta ba rekuperasaun ekonómika, liuliu sai frajil ho konsekuénsia krize ne’ebé provoka hosi impaktu COVID-19 no hosi konfinamentu ne’ebé impoin iha tinan 2020 no 2021.

“Nune’e, bele fasilita investimentu no apoiu ba empreza kiik no empreza média sira no kriasaun serbisu, hodi aumenta produtividade nasionál no hamenus taxa dezempregu, ne’ebé kontribui atu hadi’a ekonomia,” PM akresenta.

Iha dezenvolvimentu rurál, ami propoin millaun $72,2 ka 4,3% hosi OJE, hodi fó kontinuidade ba ajenda desentralizasaun, hodi estabelese instituisaun sira ne’ebé forte no haforsa kapasidade atuasaun ba estrutura lokál sira, hodi garante prestasaun serbisu públiku ho kualidade iha territóriu nasionál tomak no promove identidade nasionál no koezaun territoriál.

Governasaun Di’ak propoin millaun $116,3, ne’ebé reprezenta 6,9% hosi OJE, ne’ebé sei finansia reforma temátika no transversál lubun boot ida, liuliu introdusaun planeamentu médiu prazu iha instituisaun públika tomak no dezenvolvimentu indikadór dezempeñu sira, hanesan parte ba Reforma Jestaun Finansa Públika no Reforma Fiskál.

Kontinua mudansa paradigma iha jestaun finansa públika

Tuir Xefe Governu, Proposta Lei OJE 2022 kontinua mudansa paradigma iha jestaun finansa públika no forma atu hateke konta Estadu, inkorpora prátika internasionál sira ne’ebé di’ak liu kona-ba estrutura orsamentu, bazeia ba lójika orsamentasaun tuir programa no avaliasaun dezempeñu iha relasaun ho meta no indikadór sira ne’ebé prevee iha pilár haat hosi Planu Estratéjiku Dezenvolvimentu, maka iha Kuadru Institusionál, iha Kapitál Sosiál, iha Dezenvolvimentu Ekonómiku no iha Dezenvolvimentu Infraestrutura.

“Reforma iha domíniu finansa públika ne’e hahú iha tinan 2016, nu’udar hakat dahuluk ne’ebé presiza hodi lori ita ba forma ho hanoin ne’ebé diferente kona-ba oinsá ita uza rekursu hodi valoriza servisu ne’ebé ita sei oferese ba sidadaun sira iha detrimentu ba tetu orsamentál ou simples komparasaun entre ezekusaun orsamentál ne’ebé hetan iha tinan sira liubá,” nia tenik.

Ho hanoin ba serbisu reforma ne’e, iha tinan 2022, Governu tenki kontinua dezenvolve no uza planeamentu bazeia ba evidénsia no definisaun prioridade sira, hanesan baze ba desizaun sira kona-ba alokasaun rekursu.

Nune’e, kria ona Programa Nasionál ne’ebé hanaran ‘Igualdade Jéneru no Inkluzaun Sosiál’, ne’ebé Governu propoin atu investe ho totál millaun $203,8 iha tinan 2022 ka 12% hosi orsamentu totál.

“Programa ne’e hatudu kompromisu no investimentu Governu iha implementasaun polítika oioin ba jéneru, hanesan Planu Asaun Nasionál kontra Violénsia Jéneru, Deklarasaun Maubisse no Planu Asaun Nasionál kona-ba UNSCR 1325 – aborda violénsia jéneru, haforsa ekonomia feto, páz no seguransa,” nia dehan.

Enkuantu kona-ba proporsaun OJE ne’ebé destina ba promosaun igualdade jéneru no kompromisu ne’ebé asume ona atu halakon dezigualdade ne’ebé eziste hela, Governu estabelese ona markadór jéneru ida ba sistema planifikasaun no informasaun finanseira.

Aleinde ne’e, liuhosi investimentu substansiál, Governu fiar katak bainhira feto, joven no grupu marjinalizadu sira moris seguru, ekonomikamente protejidu no saudável, mak bele lori benefísiu ba indivíduu, família, empreza sira no ba ekonomia.

Governu hahú prosesu avaliasaun ba reajustamentu ba Planu Estratéjiku Dezenvolvimentu Nasionál, ne’ebé rezultadu avaliasaun ne’e hamutuk ho informasaun Sensu Populasaun tinan 2022, sei fornese liña baze ida ne’ebé atualizadu no realista ba planu futuru hodi garante katak foku no rekursu sira aloka ho loloos ba área prioritária sira.

“Ho aprovasaun Governu nia polítika markadór infantíl, hahú tinan 2023, ami sei introdúz markadór infantíl iha ami-nia programa hotu no sub-programa Governu, atubele identifika ho fasil investimentu rekursu públiku iha ita-nia oan sira no garante katak ami kumpre obrigasaun no kompromisu sira atu proteje no hadi’ak labarik sira hotu nia vida,” PM tenik.

Daudaun ne’e, Governu servisu hela ba dezenvolvimentu markadór defisiénsia, hanesan ho markadór labarik no jéneru, ne’e sei garante orsamentu no planu sira preparadu hodi koloka ema ho defisiénsia iha liña oin no permite atu sukat alokasaun no realizasaun, relasiona ho obrigasaun no kompromisu sira.

Atu apoia ba realizasaun meta sira ba tempu naruk no badak, tenke iha planu ba médiu prazu ne’ebé lori ba tinan naruk atu bele atinje meta ne’ebé ba tempu naruk, tanba ne’e mak funsaun Unidade Planeamentu, Monitorizasaun no Avaliasaun (UPMA) sei muda atu konsentra iha planeamentu, monitorizasaun no avaliasaun ba médiu prazu hahú iha tinan 2022.

Governu sei hahú serbisu atu dezenvolve Planu Nasionál médiu prazu ida, ne’ebé sei iha indikadór nasionál báziku lubun ida, ne’ebé liga ho kustu no fundu sufisiente atu garante ninia finansiamentu no ezekusaun, ne’ebé planu sira la inklui kustu.

“Ho aprovasaun ne’ebé Governu hein hela hosi Lei Enkuadramentu Orsamentu no Jestaun Finanseira Públika hosi Parlamentu Nasionál iha 2022, espera atu iha ferramenta foun sira atu monitoriza no kontrola jestaun finanseira públika, hanesan liuhosi aprovasaun planu konta foun ida no hadi’a sistema informátika sira ba reporte finanseiru,” PM dehan.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here