Primeiru-Ministru, Taur Matan Ruak, hamutuk ho membru Governu sira Partisipa iha debate Jeneralidade ba Proposta Lei OJE tinan 2022, iha sala plenária PN, kuarta (01/12). Imajen TATOLI/Egas Cristóvão

DILI, 01 dezembru 2021 (TATOLI)—Primeiru-Ministru (PM), Taur Matan Ruak, hateten, hafoin programa barak paradu tanba situasaun COVID-19 iha tinan 2020, nune’e tinan ne’e hahú fortalese sistema seguransa sosiál.

“Tinan 2021 nu’udar tinan ba konsolidasaun sistema seguransa sosiál, hafoin aprova Fundu Rezerva Seguransa Sosiál (FRSS) iha tinan ne’e nia laran hodi dezenvolve dilijénsia ne’ebé presiza hodi operasionaliza jestaun fundu inklui elaborasaun polítika investimentu sira, preparasaun karteira referénsia ne’ebé iha negosiasaun akordu jestaun operasionál,” Xefe Estadu relata iha diskusaun Orsamentu Jerál Estadu (OJE) 2022 loron dahuluk iha faze jeneralidade, iha sala plenária, Parlamentu Nasionál (PN), kuarta ne’e. 

Notísia relevante: INSS seidauk implementa fundu rezerva seguransa sosiál

Aleinde ne’e, Governu aprova revizaun diploma hodi asegura sosiál, atu haluan rejime kontributivu ba grupu traballadór foun sira, ho objetivu universál iha ámbitu seguransa sosiál, ne’ebé asegura protesaun traballadór ne’ebé sei ezerse temporáriamente atividade profisionál iha estranjeiru inklui garante tratamentu hanesan ba traballadór sira hotu iha Timor-Leste.

“Garante tantu rejime tranzitóriu uluk no rejime jerál foun ne’ebé abranje funsionáriu públiku, sei hetan pensaun finál justu no garante ema ne’ebé kontribui ba rejime kontributivu sei nafatin hetan pensaun boot liu fali ema ida ne’ebé la kontribui, liuhosi aprovasaun ba pensaun mínima ida,” Xefe Governu esplika.

Maski Governu rekoñese komplikasaun ne’ebé kauza hosi pandemia bele hahú konstrusaun sistema finanseiru informátiku seguransa sosiál, ne’ebé tenke konklui iha trimestre dahuluk tinan 2022 no sei permite integrasaun totál ho sistema Ministériu Finansa (MF) ba relatóriu integradu ida hosi Finansa Públika.

“Iha tinan 2022, Governu sei fó kontinuidade ba servisu ne’ebé dezenvolve ona, aposta iha konsolidasaun no reforsu sistema. Nune’e prevee kriasaun no operasionalizasaun servisu verifikasaun inkapasidade, ne’ebé sei permite pagamentu ba prestasaun sosiál iha situasaun inkapasidade no invalidéz temporáriu no permanente ba servisu,” PM tenik.

Kriasaun servisu deskonsentradu hitu hosi Institutu Nasionál Seguransa Sosial (INSS), tuir rejiaun sira hanesan medida ne’ebé PN solisita no hatuur ona iha planu rekuperasaun ekonómika, ne’ebé Governu konsidera fundamentál hodi hakbesik seguransa sosiál ba sidadaun sira.

Nune’e, kriasaun ba pensaun mínima definitiva, revizaun subsídiu apoiu ba idozu no inválidu, inklui kriasaun protesaun moras, hanesan promosaun no kampaña boot sensibilizasaun iha país laran tomak, atu nune’e seguransa sosiál bele to’o ba ema hotu iha territóriu nasionál.

Reforsu rekursu umanu INSS prevee kontratasaun hosi ema 36, ne’ebé maioria ba munisípiu ka servisu deskonsentradu.

Aleinde ne’e, sei sai mós tinan jestaun efetiva ba Fundu Rezerva Seguransa Sosiál (FRSS), ne’ebé sei iha kapitalizasaun besik millaun $158, hanesan garante sustentabilidade sistema pensaun sira iha futuru.

FRSS hanesan instituisaun setór seguransa sosiál daruak, ne’ebé kria bazeia ba Dekretu-Lei númeru 55/2020 28 outubru, ne’ebé hanesan mós INSS, ne’ebé ema koletiva iha direitu públiku, personalidade jurídika, autonomia administrativa finanseira no partimoniál.

Instituisaun ne’e mai ho misaun fundamentál atu asegura no esklusivamente efetu ba estabililizasaun finanseira no sustentabilidade rejime kontributivu seguransa sosiál.

Inskritu no benefisiáriu sistema seguransa sosiál iha tinan 2017 to’o 2021, kompostu hosi rejime naun kontributivu hosi idozu no inválidu iha 94.969, rejime tranzitóriu (pensaun) hosi invalidez, vellise, no sobrevivénsia iha 1.812, rejime jerál kontributivu iha 1.070, traballadór sira 90.993 no entidade empregadór 3.818.

Nune’e, saldo akumuladu iha FRSS to’o tinan 2021 hamutuk millaun $120.

Jornalista : Antónia Gusmão

Editora     : Julia Chatarina  

PUBLISIDADEiklan

HAKEREK NO HATÁN

Please enter your comment!
Please enter your name here