Primeiru-Ministru, Taur Matan Ruak, hamutuk ho membru Governu sira partisipa iha debate Jeneralidade ba Proposta Lei OJE 2022, iha sala plenária PN, kuarta (01/12). Imajen TATOLI/Egas Cristóvão

DILI, 01 dezembru 2021 (TATOLI)–Primeiru-Ministru (PM), Taur Matan Ruak, hateten, proposta Orsamentu Jerál Estadu (OJE) 2022 ne’ebé VIII Governu aprezenta ba Parlamentu Nasionál, nu’udar kontinuidade kompromisu polítiku ba sidadaun to’o mandatu ramata iha tinan 2023.

“Ami define objetivu haat ne’ebé atu alkansa iha tinan oin, hanesan kombate pandemia no proteje sidadaun, rekupera ekonomia, kria empregu, no iha tinan 2022 atu rekupera situasaun COVID-19,” Xefe Governu informa iha ámbitu intervensaun debate OJE 2022 ba loron dahuluk iha faze jeneralidade, iha sala plenária, Parlamentu Nasionál (PN), kuarta ne’e.

Bainhira COVID-19 identifika iha inísiu tinan 2020, infeta ona ema millaun 245 no ema millaun lima-resin maka mate iha mundu tomak.

Aleinde ne’e, Governu hasoru krize ekonómiku grave liu iha sékulu ikus no país balun rejista taxa kreximentu tun maka’as dezde depresaun boot ne’e.

“Hanesan mundu seluk, situasaun ekonomia no sosiál iha Timor-Leste hetan impaktu hosi pandemia COVID-19, ne’ebé obriga Governu taka fronteira terrestre no aéreu ba sirkulasaun internasionál, ho konsekuénsia dramátika ba sirkulasaun ema no sasán, inklui komérsiu ein jerál,” Xefe Governu haktuir.

Notísia relevante: Hahú Ohin, AACTL Suspende Temporáriu Operasaun Komersiál Internasionál

Nune’e, iha inísiu tinan 2021, iha aumentu númeru kazu e’ebé deteta iha territóriu nasionál, ne’ebé ezije Governu reforsa medida prevensaun no kombate COVID-19, ho impozisaun serka sanitária no konfinamentu jerál iha área ho númeru infetadu maka’as.

Maibé, iha loron 07 abríl 2021, Timor-Leste hahú halo planu vasinasaun nasionál kontra COVID-19, ho rekursu vasina ne’ebé hetan liuhosi mekanizmu COVAX no vasina sira ne’ebé oferese hosi país amigu hanesan Austrália, Repúblika Populár Xina, Estadu Unidu Amérika (EUA), Japaun, Nova Zelándia no Portugal, ne’ebé vasina ona ema hamutuk liu 77% hosi populasaun elejível ho doze dahuluk no 51% ho doze daruak.

Iha loron 27 outubru, lote dahuluk vasina Pfizer to’o iha Timor-Leste, ne’ebé permite atu hahú vasinasaun ba foin-sa’e sira ho idade hosi tinan 12 to’o 17.

Tanba ne’e, hafoin aumentu kazu variante Delta tama iha territóriu nasionál, iha tinan klaran, Timor-Leste hasoru ona redusaun graduál iha númeru infetadu no kazu grave sira.

Nune’e, Governu propoin atu hasa’e orsamentu COVID-19 hamutuk millaun $37,6, aleinde saldo jerénsia besik millaun $40, ne’ebé sei lori ba tinan orsamentál oin mai, nune’e bele sura ho totál besik millaun $77,8, atu hasoru inserteza ne’ebé sei ameasa saúde públika.

“Governu sei halo reabilitasaun no manutensaun ba instalasaun kuarentena iha país tomak no fó kuidadu ba sidadaun iha kuarentena, inklui sei kontinua hasa’e kapasidade vijilánsia epidemiolójika, liuhosi testajen no akizisaun doze vasina. Nune’e mós, sei haluan kampaña sensibilizasaun iha territóriu nasionál tomak no kapasita profisionál saúde sira no traballadór ne’ebé halo kontaktu diretu ho COVID-19,” Xefe Ezekutivu dehan.

Iha biban ne’e, Primeiru-Ministru dehan katak iha tinan 2022 bainhira realiza Eleisaun Prezidensiál, presiza garante katak kondisaun hotu iha ona, nune’e eventu ne’e bele realiza sein ka lahó problema.

“Presiza garante eleisaun ne’e la kontribui halo pandemia COVID-19 sai grave, tanba ne’e ami sei disponibiliza meiu hotu hodi garante realiza ho kondisaun ijiene no seguransa ne’ebé presiza. Governu sei garante katak buat hotu sei realiza sein problema no mós ho partisipasaun hosi forsa polítika hotu,” PM Taur tenik.

Governu sei investe millaun $106,7 hodi garante asesu ba saúde ne’ebé iha kualidade ba sidadaun tomak hosi idade hotu, liuhosi hadi’a instalasaun servisu saúde, prestasaun servisu saúde primáriu, no mós kuidadu saúde oioin iha internamentu, ambulatóriu no urjénsia, ho rekursu meiu diagnóstiku no terapéutika hodi apoia tratamentu saúde sekundáriu no tersiáriu.

“Ami kontinua hamenus prevalénsia no taxa insidénsia moras krónika la da’et, kontinua hadi’a estadu nutrisionál inan no labarik, garante disponibilidade no kualidade ai-moruk no ekipamentu médiku iha unidade saúde hotu, inklui kontinua promove formasaun kontinua no hasa’e kapasidade profisionál saúde sira iha espesialidade oin-oin ba interese nasaun,” Xefe Ezekutivu promete.

Iha tinan 2022, iha área saúde sei hetan benefísiu boot liuhosi parseiru dezenvolvimentu hamutuk millaun $34, ne’ebé ekivalente ho 1/5 hosi totál apoiu doadór sira.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here