FC Becune sai kampiaun Kopa AFO sub-22 époka 2021. Imajen Tatoli/Abílio Elo Nini.

OÉ-CUSSE, 30 novembru 2021 (TATOLI) – Ekipa FC Becune susesu halakon FC Amor Oébau iha jogu Kopa Assosiasaun Futeból Oé-Cusse (AFO) sub-22, nune’e Becune foti títulu kampiaun ba époka 2021 ho rezultadu 2-0 no jogadór Constâncio Oqui mellór markadór iha kopa refere.

Prestasaun ne’ebé FC Becune hetan atinje no ekipa ne’e sai títulu kampiaun iha jogu finál Kopa AFO époka 2021, ne’ebé realiza iha kampu futeból Oébau, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA), iha tersa lokraik ne’e.

“Jogu ne’e rotativa, tinan ne’e klubu 26 mak partisipa, joga hahú iha outubru ho kompetisaun hamutuk 46 durante loron 32, ohin tama ba faze finál rezultadu FC Becune mak sai kampiaun iha jogu Kopa AFO sub-22 époka tinan ne’e,” Vise-Prezidente AFO, Júlio Coel, anúnsia rezultadu ne’e iha kampu futeból Oébau Oé-Cusse.

Jogu finál ne’e iha primeira parte ho durasaun menutu 45, FC FC Becune iha ambisaun tanba jogu iha priemira parte jogadór sira domina kampu no lansa kedas kontra no atake tuir téknika no abilidade ne’ebé treinadór orienta.

Nune’e jogu primeira parte iha menutu 32, jogadór António Elo númeru kamizola 11 lansa kedas golu ida, hodi hatuur iha primeira parte ho rezultadu 1-0.

Tama ba segunda parte, iha menutu 78, jogadór Mateus Nautos númeru kamizola 7 lansa-tán golu daruak hodi hatuur metin rezultadu ba 2-0 to’o menutu 90.

Ho rezultadu ne’e, treinadór FC Amor Oébau, Octaviano Cofitalan, agradese ba ekipa rua tanba jogu iha finál la’o ho susesu.

“Ami lakon tanba jogadór sira ladún serbisu hamutuk depois ladún domina kampu. Ida-ne’e maka ami-nia frakeza lakon, maibé sei kontinua prepara hodi hadi’a ami-nia jogu ba jogu tinan oin,” nia katak.

Purtantu, Treinadór FC Becune, Domiziliano Koi, kontente tanba ekipa erforsu maka’as to’o hetan vitória iha Kopa AFO ba sub-22.

“Ami kontente tanba esforsu no mehi ne’ebé ami espera ohin sai realidade, ida-ne’e orgullu boot mai ami-nia ekipa, no rezultadu ne’e la’os katak ami joga di’ak, ami iha frakeza tanba ne’e maka ami sei kontinua treinu nafatin atu mantein pozisaun ne’e iha tinan oin,” nia dehan.

Nune’e iha rezultadu prémiu ne’e, FC Becune hetan $500,00 kompleta ho farda no bola ida, segundu lugál okupa hosi Amor Oébau FC hetan $400,00, kompleta ho farda no bola ida.

Iha ámbitu ne’e, Adjuntu Prezidente Autoridade RAEOA, Maximiano Neno, enkoraja prezidente klubu, jogadór no edeptu sira, atu kontinua treina nafatin, nune’e bele promove nafatin desportu iha Oé-Cusse.

Jogu finál ne’e ho durasaun menutu 90, lidera hosi árbitru Rodrigo Teixeira, asistente árbitru Fransisco N. Cofi, asistente dahuluk Octaviano da Cruz no asistente daruak Joaquim Mota.

FC Sarankeu okupa terseiru lugár

Ekipa FC Sarankeu foto hamutuk iha kampu futeból Oébau. Imajen Tatoli/Abílio Elo Nini.

Ekipa FC Sarankeu okupa terseiru lugál hafoin halakon FC Binipu ho rezultadu 3-2. Jogu iha primeira parte ho durasaun 45 menutu, ekipa rua lansa kedas kontra no atake tuir téknika no abilidade ekipa ida-idak nian.

FC Binipu iha ambisaun maka’as tanba jogu foin hahú to’o de’it menutu 5 jogadór Bernardus Abi númeru kamizola 14 lansa kedas golu ida, hodi hatuur rezultadu 1-0. Nune’e jogu kontinua la’o to’o termina jogu primeira parte, FC Binipu lidera provizóriu ho rezultadu 1-0.

Tama ba segunda parte iha menutu 46, jogadór Bernardus Abi númeru kamizola 14 lansa-tán golu daruak, hodi muda rezultadu ba 2-0.

Purtantu, rezultadu ne’e halo ekipa FC Sarankeu hahú lansa fali estratéjia foun hodi troka jogadór sira, ho estratéjia ne’e konsege iha duni rezultadu di’ak ba ekipa FC Sarankeu, tanba jogu foin to’o menutu 48 jogadór Joseferino Anin númeru kamizola 7 lansa golu hodi muda rezultadu ba 1-2.

Sorte di’ak ba ekipa FC Sarankeu, tanba to’o menutu 61, jogadór Joseferino Anin lansa-tán golu daruak hodi hatuur rezultadu ba 2-2.

Jogu kontinua la’o, ekipa FC Sarankeu hahú serbisu maka’as no domina kampu, nune’e jogu kontinua la’o to’o fali menutu 66, jogadór Mayolus Oqui númeru kamizola 12 lansa-tán golu ida hodi muda rezultadu ba 3-2.

Nune’e jogu kontinua la’o to’o termina jogu segunda parte ho durasaun tempu menutu 90, ekipa FC Sarankeu hetan vitória hodi okupa terseira lugár iha Kopa AFO époka 2021.

Nune’e, treinadór FC Binipu, Januariu da Costa, agradese ba ekipa jogadór sira, maske lakon maibé hatudu disiplina no jogu di’ak iha kampu laran.

Nune’e mós, Treinadór FC Sarankeu, Sebastião Oqui, orgullu tanba esforsu ne’ebé jagadór sira hatudu dezde jogu hahú inisiu to’o termina, iha rezultadu hodi asume terseira lugár iha Kopa AFO époka tinan 2021.

Nune’e iha jogu terminasaun ne’e ezekutivu AFO prevee prémiu hamutuk $300,00 kompleta ho farda desportu inklui bola ida, no kuartu lugár hosi FC Binipu hetan $200,00, kompleta ho farda desportu inklui bola ida, ne’ebé apoiu finánsiamentu hosi Federarasaun Futeból Timor-Leste (FFTL) no Autoridade RAEOA.

Constâncio Oqui mellór markadór

Constâncio Oqui sai mellór markadór iha jogu Kopa AFO époka 2021. Imajen/mídia AFO.

Jogadór prinsipál hosi FC Sebuki, Constâncio Oqui númeru kamizola 12, sai nu’udar mellór markadór hahú hosi jornada dahuluk to’o jogu 8 finál konsege produs golu hamutuk 12 iha Kopa AFO sub-22 époka 2021.

“Mellór markadór ka hatama golu barak iha tinan ne’e mai hosi FC Sebuki liuhosi jogadór númeru kamizola 12 Constâncio Oqui, tanba jogu hahú hosi inisíu to’o remata nia konsege produs golu hamutuk 12,” Vise Prezidente AFO Júlio Coel anunsia.

Ezekutivu ne’e fó-sai katak, alende ne’e ba mellor jogadór iha jogu Kopa AFO durante kompetisaun 46 mai hosi klubu 26, mellór jogadór mai hosi FC Oébau liuhosi jogadór Alarico Mota númeru 11.

Nune’e, mellór markadór Constâncio Oqui agradese ba ekipa Asosiasaun Futeból Oé-Cusse, tanba kria jogu ne’e fó oportunidade atu hatudu modalidade desportu tuir kbiit no abilidade ne’ebé joven sira iha.

“Ha’u agradese ba AFO tanba loke Kopa ne’e ba joven idade 22, atu hatudu ami-nia talenta. Ha’u sente kontente sai hanesan mellór markadór iha Kopa AFO tinan ne’e, ha’u mós agradese ba ami-nia ekipa tanba ami serbisu hamutuk mak ohin ha’u sai mellór markadór,” nia orgullu.

Ho prestasaun ne’ebé Constâncio Oqui atinje, ezekutivu AFO prevee prémiu hamutuk osan $50,00 kompleta ho farda desportu inklui bola ida ba mellór markadór no mellór jogadór prevee prémiu osan $40,00 kompleta ho farda desportu inklui bola ida.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here