Entidade relevante partísipa iha semináriu nasionál. Imajen Tatoli/Celestina Teles.

COVALIMA, 30 novembru 2021 (TATOLI)—Asosiasaun HAK tersa ne’e hala’o semináriu Nasionál ho tema “Direitu Prizioneiru Sira hodi Asesu ba Justisa Formál” ne’ebé realiza iha Salaun Administrasaun Munisipál Covalima.

Reprezentante Administradór Munisípiu Covalima, Afonso Nogueira Nahak, hateten bazea ba tema ne’e bainhira sosiedade kontribui ba pás no estabilidade, prizaun no tribunal sira iha Timor-Leste bele taka.

“Atu taka prizaun no tribunal iha rai ida-ne’e, ita tenke no presiza servisu makaas hodi hametin no kontribui pás no estabilidade iha Timor-Leste,” Afonso Nogueira Nahak hateten liuhosi nia diskursu bainhira partisipa iha semináriu nasionàl ne’e.

Atu hametin pás, sidadaun sira hasoru malu tenke hatudu oin midar, hamnasa no ko’alia ba malu ho lia-mamar no asaun ne’e bele kontribui hodi harii pás iha família, rai laran no iha fatin hotu-hotu.

Tanba ne’e, mehi ba oin atu servisu hamutuk nafatin la’ós hosi seguransa de’it maibé ho entidade hotu-hotu atu no tenke kontribui ba pás, nuna’e mehi atu atu harii prizaun foun ne’e labele akontese tán no prizaun sira-ne’ebé eziste on abele taka ho neineik.

Koordenadór Gaibinete Sosiedade Sivil Primeiru Ministru Filipe da Costa reforsa, ema hotu iha mehi atu taka prizaun iha Timor-Leste maibé sidadaun sira tenke kumpre lei.

“Ha’u-nia hanoin iha mehi atu taka prizaun ita bele taka ona infernu, hakarak harii sidadaun di’ak hodi kumpre lei hotu. Ha’u hanoin, loron ida ita bele taka prizaun maibe tenke liuhosi  diskusaun,” nia dehan.

Iha biban ne’e. Filipe da Costa hato’o parabéns ba Asosiasaun HAK hodi realiza semináriu nasionàl ne’e hetan apoiu hosi Gabinete Sosiedade Sivil.

“Ami kontinua sei apoiu nafatin, tanba ne’e ohin ita bele realiza semináriu sira, tanba ita atu ko’alia kona-ba direitu prizoneiru sira-ni’an ne’e importante tebes. Tanba, Asosiasaun HAK hakarak halo advokasia di’akliu hodi kontribui ba ita-nia sosiedade,” nia dehan.  

Iha semináriu nasionál ne’ebè organiza hosi Asosiasaun HAK ne’e, konvida oradór sira hosi  PDHJ hodi aprezenta matéria deskobrementu no dezafiu PDHJ nian, hosi progresu servisu monitorizasaun no investigasaun ba kazu violasaun diteitu umanu.

PDHJ mós esplika kona-ba progresu no dezafiu Defensór públiku ba atendementu no akompaniamentu kazu sira, no komandante PNTL Covalima prosesu investigasaun ba kazu ne’ebè akontese iha Timor-Leste liu-liu iha Covalima. 

Enkuantu, istorikamente dezde Asosiasaun HAK nia ezisténsia nu’udár ikon organizasaun direitu umanu hahú ho nia misaun prinsipál mak advogadu hodi defende maluk prizioneiru sira, politiku sira-ne’ebè detein hosi militár Indonézia durante periód okupasaun nia laran.

Durante iha okupasaun Indonézia, HAK hala’o servisu nu’udar defensór ba direitu umanu prizoneiru sira-nian, liu-liu timor-oan sira-ne’ebè mak hetan detensaun no tortura hosi militár Indonézia sira.

Hafoin Timor-Leste restaura nia independénsia, HAK nafatin empeña nia servisu iha área monitorizasaun, advokasia no formasaun iha área oioin relasiona ho asuntu sira direitu umanu iha Timor-Leste.

Aspeitu esensiál ne’ebè HAK kontinua tau matan mak asuntu justisa formál nia lala’ok relasiona ho direitu prizoneiru sira-nian atu hetan prosesu justisa ne’ebè justu ba ema hotu. 

Nu’udar Estadu Direitu, orgaun no instituisaun tomak halo esforsu ho sériu hodi hatuur no maximiza instrumentu hotu, nune’e bele asegura no garante obrigasaun Estadu iha direitu prizoneiru sira. 

Bazea ba lei norma Internasional nó Nasionàl katak ema hotu hetan akuzasaun ba nia hahalok krime ruma nafatin iha direitu atu konsidera nia hanesan ema sala laek ka inosente durante prosesu tomak molok tribunál deside, nia sala duni. Mezmu iha desizaun ikus tribunál nian maibé nafatin nu’udar direitu inosente hodi konkore kontra desizaun tribunál iha primeira instánsia nian. 

Aleinde ne’e, ema kondenadu (prizoneiru) sira nafatin iha direitu hodi komunika ho nia defeza ka advogadu ne’ebè nia rasik hili atu nune’e bele hatene ninia lala’ok kazu sira nian, nune’e mós prizoneiru preventiva sira iha direitu atu hetan julgamentu ne’ebè exesivu no la atrazu. 

Iha Deklarasaun Universál Direitu Umanu (DUDU artigu 11, konvensaun Internasionál direitu sivil no Politiku (KIDSP artigu 14.2), RDTL artigu 31, no artigu 32 kona-ba mak sala ne’ebè hetan ona pena ka medida seguransa, hakloot nia Liberdade. Maibé, bele hetan nafatin nia direitu fundamentál, menus buat hirak ne’ebè nakait ba kondenasaun kona-ba ezijensia prosesu ne’e.

Bazea ba dadus hosi Asosiasaun hak tinan 2021, prizoneiru iha prizaun Becora hamutuk 518 hosi númeru ne’e kondenadu 407, prizaun preventiva 111, prizoneiru iha Gleno hamutuk 111 hosi sira-ne’e kondenadu 97, prizaun preventiva na’in-lima (5) no iha prizoneiru 105 kondenadu 70, prizaun preventiva 35, 

Hosi dadus ne’e kompostu hosi mane 707 feto 18, prizoneiru estranjeiru 12, prizoneiru Timor-Leste 713, prizoneiru juvenil 30 no prizoneiru adultu 695. 

Jornalista : Celestina Teles

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here