Jogadór selesaun nasionál hala’o treinamentu iha estádiu jalan besar Singapura. Imajen/ FTTL

DILI, 30 novembru 2021 (TATOLI)— Treinadór Prinsipál Selesaun Nasionál Timor-Leste, Fabio Maciel, informa, daudaun selesaun nasionál prontu fó fíziku, mentál no tékniku atu kompete iha jogu Asian Football Federation (AFF) Suzuki Cup 2021, ne’ebé abertura iha singapura, semana ne’e.

Treinadór Prinsipál Selesaun Nasionál Timor-Leste, Fabio Maciel. imajen/ FFTL

“Ita nia ekipa preparadu iha fiziku, mentalidade no tékniku atu kompete iha jogu. Ha’u iha esperansa makas atubele manán iha jogu sira mai ne’e,” Treinadór Fabio ne’e hateten ba Agência TATOLI liuhosi virtuál ne’ebé hala’o iha edifisiu FFTL, tersa ne’e.

Ekipa Timor-Leste sei infrenta jogu ho ekipa maioria difisil, maibé la sai obstakulu tanba jogadór hotu mesak joven no vontade ne’ebé di’ak.

Jagadór ekipa Lafaek antes ne’e ba Singapura hodi partisipa jogu kualifikasaun AFC hamutuk na’in-30, maibé jogu faze dahuluk ramata ona foku liu ba selesaun senior, nune’e jogadór na’in-neen konsidera kiik liu fila mai Timor-Leste.

Durante, iha Singapura jogadór   selesaun nasionál Timor-Leste hala’o treinamentu normál liuliu iha Estádiu Jalan Besar.

“Ekipa Timor-Leste sei joga hasoru ekipa jigante hanesan Sea Games, AFC Cup no seluk tan, nune’e la hakfodak ho performe ne’ebé nasaun sira ne’e iha. Ha’u servisu makas atu hatudu nia performe brillante iha jogu sira,” nia akresenta.

Ekipa ne’ebé partisipa iha jogu AFF Suzuki Cup fahe ba grupu rua A no B, hosi grupu ne’e Timor-Leste monu iha grupu A hamutuk ho Thailandia, Myanmar, Filipina, Singapura.

Enkuantu grupu B hanesan, Indonézia, Malázia, La’os, Cambodia no Vietnam.

Tuir oráriu jogu hahú iha 05 dezembru, Timor-Leste jogu hasoru Thailandia, kontra Myanmar iha 08 dezembru, kontra Filipina iha 11 dezembru no ikusliu Timor-Leste kontra singapura iha 14 dezembru.

“Iha jogu ne’e, ekipa rua mak sei utrapasa ba faze semi-finál. Preparasaun hosi Timor-Leste ho másimu ne’ebé garante seu to’o semi-finál,” Treinadór ne’e garante.

Notísia Relevante: Ekipa Timor-Leste prepara kompete jogu AFF Suzuki Cup 2021

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here