Imajen/Media PR.

DILI, 30 novembru 2021 (TATOLI)—Parlamentu Nasionál, tersa ne’e liuhosi plenária extaordinária aprova projetu rezolusaun Parlamentu Nasionál númeru 83/V(4a), institui prémiu Max Stahl.

Notísia Relevante:PN aprova votu pezár ba saudozu Dom Basílio no Max Stahl

“Rezultadu votasaun a-favór 48, kontra no abstensaun laiha, nune’e projetu rezolusaun institui prémiu Max Shatl aprovadu. Ho ida-ne’e, komisaun A sei prepara regulamentu ba implementasaun durante loron 90,” Prezidente Parlamentu Nasionál, Aniceto Longuinhos Guterres Lopes, anunsiu liuhosi plenária extaordinária.

Inisiativa rezolusaun ne’e tanba momentu PN aprova votu pezár ba falesimentu saudozu Max Stahl hanoin hosi plenária atu oinsá mak dignifika liután erói sira-ne’ebé mate iha masakare Santa Cruz 12 novembru 1991 iha semitériu Santa Cruz, Dili.

Nune’e, meza PN halo exersísiu aprezenta ideia atu oinsá Parlamentu Nasionál hamosu prémiu ida ba liberdade espresaun atu valoriza sidadaun sira-ne’ebé bele sai pioneiru atu fortifika liberdade espresaun hanesan direitu sidadaun ne’ebé konstituisaun konsagra tiha ona.

“Tanba ne’e iha kontestu ne’e meza aprezenta proposta projetu rezolusaun ne’ebé ita atu diskute no aprova. Tanba daudaun ne’e sei iha prosesu diskusaun OJE 2022, nune’e PN bele prevee orsamentu tinan oin bele implementa prémiu refere,” Aniceto Guterres hateten.

Saudozu Max Stahl fó ona kontribuisaun ba Timor-Leste nia kauza luta auto-determinasaun hasoru okupasaun ilegál Indonézia, ne’ebé filma masakre Santa Cruz 12 novembru 1991 hodi fó sai no loké mundu nia matan kona-ba brutalidade oioin hasoru povu timorense.

Ho kontribuisaun saudozu Max Stahl nian ba luta libertasaun nasionál, mak Estadu Timor-Leste antes ne’e fó ona kondekorasaun no Parlamentu Nasionál iha dezembru 2019 atribui nasionalidade sai timorense.

Tan ne’e, liuhosi projetu rezolusaun institui prémiu Max Sathl, PN fó rekuñesimentu aas nafatin, ho onra no ho objetivu atividade dezenvolve hosi personalidade organizasaun ba valór liberdade espresaun ho sentidu promosaun.

Nune’e mós, iha valór divulgasaun no kuñesimentu kona-ba liberdade espresaun no prezervasaun memória istória luta ba nasaun kontribui hanesan ba edukasaun sívika no empoderamentu juventude.

PN fó rekuñesimentu tanba atu fó onra edukasaun ba profisionalizmu, apoiu kauza libertasaun auto-determinasaun povu timorense, mantein viva nia memória no espíritu kombativu no espíritu joven iha loron 12 novembru 1991 hasoru presaun ba liberdade.

Nune’e, komisaun A sei diskute regra implementasaun hodi bele implementa prémiu refere anualmente hahú iha tinan oin.

Deputadu PD, António da Conceção, hateten inisitiva ne’e di’ak no importante atu promove solidariedade internasionál ninian. Tanba ita hotu tenke rekuñese ukun rasik-an, loos duni la’ós manan de’it frente armada nian iha funu maibé kontribui mós hosi solidariedade internasionál mak jornalista Max Stahl bele espresa partisipa luta hodi haboot funu liuhosi filmazen.

“Presiza instituisionaliza prémiu ne’e hanesan uma demokrásia Parlamentu ne’ebé reprezenta deputadu fó apoiu,” nia dehan.

Deputadu Fretilin, Antonino Bianco, kondisera prémiu ne’e merese duni maibé hanoin mós jornalista barak sira seluk mak mate mós ba nasaun ne’e tenke konsidera hotu labele haluha ninia naran.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here