Atividade konstrusaun estrada nasionál Baucau-Viqueque. Imajen/MOP

DILI, 30 novembru 2021 (TATOLI)–Eis Primeiru-Ministru, Mari Alkatiri, rekomenda Governu halo manutensaun projetu infraestrutura oin tolu ba ne’ebé ezekuta ona, nune’e bele garante kualidade iha tempu naruk.

“Kuandu kontratór entrega projetu ba Governu, tenki hahú manutensaun oin tolu hanesan manutensaun rutina, períodika no realibitasaun, maibé bainhira la halo rutina no períodika, bele halo de’it projetu reabilitasaun,” Eis PM hateten iha ámbitu semináriu rezultadu avaliasaun ex-post ba projetu infraestrutura iha Timor-Leste, iha auditorium Ministériu Finansa (MF), Aitarak-laran, tersa ne’e.

Líder nasionál ne’e nota katak durante ne’e Governu ninia erru fundamentál mak entrega estudu viablidade ba empreza.

“Nune’e mós, kualidade dezeñu tanba dala barak projetu dada tempu entre kontratór no fiskalizasaun, hodi ikus mai husu kustu adisionál, ne’ebé tenke klaru iha kontratu, se projetu ne’e implementa tarde, kontratór mak tenke hasai osan selu fiskalizasaun atu evita parte rua labele dada hodi manan-osan,” nia fó hanoin.

Eis Xefe Governu bolu atensaun Governu atu kuidadu iha faze aprovizionamentu, tanba dala barak empreza tenta aprezenta orsamentu kiik tanba hatene katak sei hetan adisionál, tanba ne’e Governu tenke halo estudu viabilidade ho kalkulasaun ona.

“Bainhira iha konkorrente ida aprezenta menus hosi 20% tenke kuidadu, ne’e katak nia bele implementa obra la kualidade ka bele husu orsamentu adisionál,” nia tenik.

Iha sorin seluk, Eis PM Alkatiri, konsidera prosesu hotu presiza hahú ho estudu viabilidade, ne’ebé faze ne’e la’ós ba estudu téknika jeofízika, jeolójika, no idrolójika de’it, maibé viablidade finanseira ekonómika.

“Ba rai ida hanesan ita-nia ne’ebé ema menus rendimentu barak, iha impaktu ba sosiál no polítiku. Tanba ne’e presiza iha entidade seluk responsabiliza ba estudu ne’e. Ikus mai ita haree molok Governu deside halo estrada ida, ema balun tun ona halo estudu no kalkulasaun orsamentu, sá estudu mak ne’e? estudu viabilidade Governu mak tenke haree, biar konsultór ruma mak halo maibé prioridade Governu nian,” Alkatiri kestiona.

Programa dezenvolvimentu tenke responde nesesidade nível tolu

Eis titulár ne’e subliña, programa dezenvolvimentu tenke responde ba nesesidade nível tolu hanesan imediata ne’ebé toka ba nesesidade bázika povu, mediate ne’ebé arranka ho dezenvolvimentu estruturante liu no longu prazu ne’ebé sustenta ba restu dezenvolvimentu hotu.

“Ida-ne’e presiza iha, maibé ikus-ikus ne’e laiha ona no idaidak halo ninian. VIII Governu muda naran Ministériu Planeamentu no Investimentu Estratéjiku ba Ministériu Planu no Ordenamentu, signifika mudansa konseitu, dezenvolvimentu mai ho planu ba planu mai ho ordamentu, ne’e mak laiha to’o agora, uluk ita ko’alia de’it planeamentu investimentu estratéjiku maibé  laiha ordenamentu, estudu balun halo maibé la respeita ordenamentu bele fó implikasaun ba buat hotu,” nia dehan.

Notísia relevante: Reajustamentu PED 2011-2030 hodi adapta realidade ohin loron

Enkuantu, eis PM ninia haree kona-ba pozisaun kompeténsia desde tinan 2007 akontese sobre pozisaun no konkorrénsia kompeténsia.

“Iha Ministériu Obra públika no Ajénsia Dezenvolvimentu Nasionál (ADN), maibé la defini didi’ak funsaun idaidak ninian, katak konkorrénsia kompeténsia, ADN dehan fiskaliza no avalia projetu, inklui aprezenta projetu, tanba ne’e mak kria konflitu entre parte rua ne’e,” Alkatiri esplika.

Nune’e, nia husu atu defini didi’ak ADN ninia funsaun, ne’ebé ba kestaun ne’e propoin ba fiskalizasaun ho konsulta.

“Ida-ne’e ha’u-nia proposta, atu nune’e Governu bele iha ninia funsaun iha avaliasaun finál ba projetu, se nia fiskaliza no ikus mai halo avaliasaun finál, entaun nia tenta atu defende-an. Bainhira halo dezeñu mak la fiskaliza no la konstroe, sé mak atu fiskaliza entidade ne’ebé kontrata no avalia finál, ne’e kompeténsia Governu, tanba ne’e faze importante,”  nia sujere.

Eis Xefe Ezekutivu konsidera, presiza defini didi’ak projetu atu halo jestaun ba impaktu ida-idak, tanba projetu nia vida depende ba kualidade implementasaun no manutensaun.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here