Diákonu na’in-tolu ne'ebé simu ona ordenasaun saserdósiu hosi Dom Virgílio do Carmo iha Igreja Katedrál Dioseze Baucau, Vila Antiga, tersa (30/11). Imajen Tatoli/Natalino Belo.

BAUCAU, 30 novembru 2021 (TATOLI) – Arsebispu Arkidioseze Metropolitana Dili, Dom Virgílio do Carmo da Silva, tersa ne’e fó ordenasaun ba Diákonu na’in-tolu iha Igreja Katedrál Dioseze Buacau.

Diákonu na’in-tolu ne’ebé sai ona Padre mak hanesan Padre Claudino Mendonça Maia, Padre Dionísio Felismino Duarte Guterres Soares no Padre João Paulo Soares Henrique ne’ebé sei hala’o vida saserdósiu iha Dioseze Baucau.

Dom Virgílio liuhosi omília hateten, ho grasa saserdósiu nian ne’ebé na’in Maromak haraik, maske Igreja Katólika Timor-Leste, liuliu Dioseze Baucau iha tinan-ne’e lakon Amu Bispu Dom Basílio do Nascimento no Padre Pinheiro e Silva maibé nai Maromak fiar iha sira na’in-rua fó fali mai igreja iha tinan ida-ne’e amu-lulik foun na’in-tolu.

“Ho ordenasaun ne’e nu’udar forsa no kbiit mai hosi Lalehan nian no imi sai instrumentu moris Kristu nian iha hahalok no lia-fuan,” Dom Virgílio hateten iha Igreja Katedrál, Vila Antiga.

Arsebispu Metropolitana ne’e akresenta, liuhosi grasa Maromak nia domin ne’ebé fó mai sarani sira atu sai dalan no la kole hahí Maromak.

Dom Virgílio hateten, matenek de’it la to’o bainhira laiha sinál hosi Maromak, maske halo di’ak barak maibé la’ós buat hotu Maromak hakarak, ema halo di’ak barak tanba dalaruma tuir planu no projetu rasik la’ós Maromak nian.

Nune’e mós ema barak hakarak obriga Maromak atu aprova de’it, maibé dalabarak mós Maromak kontra planu sira hosi ema nune’e são José mak sai modelu ba ita tanba Maromak fihir no hili.

“Sira-nia saran-aan ba nai Maromak liuhosi ordenasaun saserdósiu ohin nai Maromak ho nia kbiit haraik ba ita atan sira-ne’e dignidade preziteiru nian,” Dom Virgílio akresenta.

Administradór Diosezanu Dioseze Baucau, Padre Alípio Pinto Gusmão, fó parabéns ba bibi-atan na’in-tolu ne’ebé simu ordenasaun saserdósiu tanba hatán ona Maromak nia atensaun no entrega-aan iha Dioseze Baucau.

Padre Alípio hateten objetivu iha semináriu mak atu sai padre nune’e tenke serbí iha kualkér fatin no Dioseze Baucau mak sai fatin atu hakna’ar-aan nu’udar vida saserdósiu.

Reprezentante Saserdósiu foun, Padre Claudino Mendonça Maia, hateten, liafuan maktoban Bispu Dom Basílio do Nascimento ne’ebé dehan “Ita-nia istória rasik mak sai hanesan referénsia ba ita-aan rasik no ba ema seluk”. Katak Padre na’in-tolu nia istória mai to’o ohin loron la’ós liuhosi de’it anin, maibé liuhosi liman badaen no neon matenek sira hanesan família, formadór, padre no kolega hotu ne’ebé sira hasoru no kompartilla moris ida-ne’e.

“Ami rekoñese ho fuan ne’ebé haraik-aan no nakonu ho sentidu gratidaun, atan, ha’u iha lian Padre Dionísio no Padre João Paulo nian hakarak agradese ba santísimu trindade ne’ebé fihir no bolu ami na’in-tolu liuhosi dalan naruk no vokasaun ne’ebé la hanesan,” Padre Claudino hateten.

Padre Claudino Mendonça Maia moris iha postu administrativu Maubisse, munisípiu Ainaro iha loron 26 jullu 1988, oan hosi José Mendonça Maia no Joana Salsinha de Almeida.

Purtantu, Padre Dionísio Felismino Duarte Guterres Soares moris iha Ataúro, Dili iha loron 4 jullu 1987, oan hosi Vicente Guterres no Fernanda de Araújo.

Entretantu, Padre João Paulo Soares Henrique moris iha loron 16 outubru 1989, hosi Suku Ma’abat, postu administrativu Manatuto Vila, Munisípiu Manatuto, no oan hosi Lucas Henrique da Silva no Clementina Soares.

Entretantu, partisipa iha ordenasaun saserdósiu ne’e kompostu hosi amu selebrante Dom Virgílio do Carmo da Silva, akompanã hosi Bispu Dioseze Maliana, Dom Noberto do Amaral, Administradór Diosezanu Dioseze Baucau, Padre Alípio Gusmão no partisipa hosi autoridade munisipál, família no sarani dioseze tolu.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here