Estrada hetan estragu tanba atividade lalin fatuk hosi Kaitehu bá konstrusaun Portu Tibar, sesta (02/07). Imajen TATOLI/Francisco Sony

DILI, 30 novembru 2021 (TATOLI)–Primeiru-Ministru (PM) Taur Matan Ruak, hateten, presiza objetivu tolu hodi dezenvolve infraestrutura ho kualidade tanba importante tebes no sai preokupasaun ba parte hotu tanba Governu halo investimentu boot iha área ne’e.

“Nasaun hotu inklui Timor-Leste hakarak dezenvolve ninia infraestrutura ho di’ak, ho objetivu bele fó fasilidade no reforsa kapasidade konetividade, kria kondisaun aumenta kompetividade, no integrasaun nível rejionál no mundiál,” PM dehan iha ámbitu semináriu kona-ba rezultadu avaliasaun ex-post ba projetu infraestrutura ne’ebé asina iha Timor-Leste, iha auditórium Ministériu Finansa (MF), tersa ne’e.

Notísia relevante: Projetu ‘ongoing’ hamutuk 328 iha tinan 2019 to’o 2021

Tuir Xefe Governu, nasaun ho nível infraestrutura menus sei difisíl atinje objetivu tolu no normalmente investimentu akontese iha área saneamentu, enerjia, komunikasaun, estrada, portu no aeroportu.

“Bainhira ita haree didi’ak iha ita-nia rain, investimentu infraestrutura boot tebes, infelizmente la’ós investimentu hotu hetan rezultadu hanesan saida mak ita dezeja,” Taur akresenta.

Xefe ezekutivu identifika iha problema kona-ba difinisaun prioridade no kualidade.

“Bainhira ha’u sei Prezidente Repúblika, ha’u krítika obra sira, tanba investimentu barak laiha kualidade. Maibé presiza iha avaliasaun no esforsu boot atu infraestrutura ne’ebé ita halo bele iha impaktu ba vida sidadaun sira, kapasidade rejiste dezastre, ezemplu foin daudaun akontese, ne’ebé prátikamente destroe infraestrutura sira,” nia dehan.

Tuir Xefe Ezekutivu, problema infraestrutura hanesan responsabilidade Governu, la’ós ministériu ka ajénsia ida de’it, tanba bainhira empreza sira atu hahú obra ida, liu prosesu ne’ebé envolve instituisaun Estadu oin-oin.

“Instituisaun sira iha responsabilidade boot ba projetu sira no dala barak ita iha dezagregasaun, ne’e difikulta komandu kontrolu, entre Ajénsia Dezenvolvimentu Nasonál (ADN) no Ministériu Obra Públika (MOP) bele dun malu. Pur tantu iha dezagregarasaun boot ida ne’ebé iha prátika hatudu laiha komandu kontrolu di’ak, entaun ikus mai lakon, tanba ne’e Governu tenke responsabilidade ba ida-ne’e perante populasaun no nasaun tanba envolve kustu boot,” nia akresenta.

Biban ne’e, Xefe Governu preokupa investimentu ba Aeroportu Internasionál Suai, ne’ebé gasta osan boot maibé abandonadu, nune’e mós auto estrada.

Notísia relevante: Aeroportu Suai Nakonu ho Foer, Ministru José Agostinho Sei Diskute ho Entidade Relevante

“Projetu Aeroportu Internasionál hafoin tinan 10 liu ninia utilidade sai difísil. Ha’u tenke bolu Ministru Transporte no Komunikasaun atu haree, ho investimentu millaun $70-resin maibé agora duut mak nakonu, tanba aviaun la tun iha ne’ebá. Nune’e mós investimentu ba auto estrada, ita ko’a estrada sira la konsiente katak foho iha loron ida bele tun taka estrada, kestaun sira ne’e ita tenke haree,” PM Taur preokupa.

Governu gasta ona biliaun $1,2 ba projetu infraestrutura

Iha sorin seluk, Governu finansia ona projetu hamutuk 1.856 iha tinan 2018 to’o 2021, ho orsamentu alokadu biliaun $1,2, ho ezekusaun millaun $750 (64%), ne’ebé projetu balun sei ongoing, projetu ne’ebé konklui 1.056, projetu pendente 13, projetu foun iha tinan 2022 hamutuk 236, ein kursu 330, projetu seidauk inisia 242.

“Projetu barak envolve rekursu finanseiru barak, agora kapasidade kontrolu ne’e iha ka lae, tanba buat barak ne’e normalmente atu kontrola susar, se ita haree didi’ak iha ezekusaun orsamentu liliu fundu infraestrutura, iha tinan 2018 iha 85,5%, iha 2019 ezekuta 76,8%, tinan 2020 hamutuk 75% no 2021 to’o fulan-setembru ezekusaun 13%,” PM haktuir. 

Nune’e, Xefe Governu husu entedida responsável sira tenke kuidadu bainhira atu gasta alokasaun ba infraestrutura, nune’e bele garante ninia kualidade.

Governu mós sei husu tulun ba Japan International Cooperation Agency (JICA) no parseiru dezenvolvimentu seluk atu halo avaliasaun investimentu infraestrutura, liuliu kualidade, impaktu no utilidade ba nasaun.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here