Atividade sensibilizasaun lei MPCC ba membru CCI-TL, iha salaun Delta Nova, tersa (30/11). Imajen TATOLI/Arminda Fonseca

DILI, 30 novembru 2021 (TATOLI)-Komisaun Anti-Korrupsaun (CAC, sigla portugés), iha tersa ne’e, halo sensibilizasaun lei númeru 7/2020 kona-ba Medida Prevensaun Kombate Korrupsaun (MPCC, sigla portugés) ba Cámara Comércio e Indústria Timor-Leste, (CCI-TL).

Komisáriu CAC, Sérgio Hornai, hateten, inisitiva sensibilizasaun lei tanba iha dispozisaun legál ne’ebé iha ligasaun papél setór privadu ho krime  korrupsaun.

“Ita hakarak halo parseria ho CCI-TL, ne’ebé foku de’it ba emprezáriu nasionál no munisipál, tanba atividade ne’e ho karakter obrigasaun tuir lei, atu ajuda emprezáriu hatene risku, nune’e buka meiu atu prevene,” Komisáriu dehan iha Salaun Delta Nova, Dili.

Notísia relevante: PTR-PPN kontinua diskute implementasaun Lei MPCC

Sensibilizasaun ne’e ho objetivu forma mekanizmu no kobertura matéria relevante hosi lei MPCC ba ajente públiku no empreza, nune’e hasa’e koñesimentu komprensivu ba deklarante sira kona-ba prosedimentu rejistu deklarasaun rendimentu, bens no interese, motiva funsionáriu no ajente públiku sira halo desizaun ne’ebé fó importánsia ka atensaun ba prinsípiu boa governasaun hanesan transparánsia, akuntabilidade, responsabilidade, independente no justu.

Nune’e, empreza sira bele iha koñesimentu kle’an kona-ba implemetasaun lei MPCC no prosidementu, tanba iha artigu kona-ba frau konstrusaun, obstrusaun atividade ne’ebé halo hosi parte públiku, liuliu servisu aprovizionamentu finansa, ne’ebé emprezáriu sira iha obrigasaun kontribui ba jestaun di’ak.

“Ita fó informasaun ba emprezáriu sira hodi evita iha krime korrupsaun pasiva no ativa iha setór privadu, tanba lei MPCC sei veinkulu aktu balun ne’ebé halo emprezáriu sira iha partisipasaun ruma ba kontratasaun ho setór públiku, ba akizisaun, servisu no konstrusaun sira, ne’ebé tuir lei jestaun finanseira mensiona,” nia tenik.

Nune’e, Komisáriu konsidera korrupsaun nu’udar krime ne’ebé fó ameasa ba valór demokrasia, impede dezenvolvimentu nasionál no hamate kompetisaun negósiu ne’ebé justu, nune’e prejudika polítika ekonómia no justisa Estadu ba dezenvolvimentu nasionál.

Tuir artigu 6 Konstituisaun kona-ba objetivu Estadu atu promove no garante moris di’ak ba povu tomak maka  halo eforsu oioin atu prevene no kombate korrupsaun, nune’e esforsu hirak ne’e bele hatuur iha ratifikasaun konvensaun ONU Kontra Korrupsaun, Rezolusaun Parlamentu Nasionál númeru 25/2008, hafoin lei númeru 8/2009 kona-ba Kriasaun CAC.

“Ita-nia rezultadu sensibilizasaun ne’e halo ajente públiku no emprezáriu iha koñesimentu adekuadu kona-ba lei MPCC iha ámbitu elaborasaun estratejia nasionál ba prevene no kombate korrupsaun inklui krime relevante korrupsaun sira iha setór privadu, deklarasaun rendimentu bens no interese ba ajente públiku,” Komisáriu CAC informa.

Iha fatin hanesan, Prezidente CCI-TL, Oscar Lima, apresia ho inisiativa ne’e tanba halo emprezáriu sira bele iha koñesimentu hodi hadook-an hosi korrupsaun.

“Lei MPCC mensiona bainhira ema ne’ebé komete korrupsaun ka subornu fó osan no simu osan mós kona hotu, entaun sensibilizasaun ne’e bele halo emprezáriu sira intende didi’ak bainhira halo buat ruma, nune’e labele komete krime,” emprezáriu timor-oan ne’e dehan.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here