Administradór munisípiu Viqueque, Januário Soares ‘Bolly’. Imajen TATOLI/ Vitorino Lopes da Costa

VIQUEQUE, 30 novembru 2021 (TATOLI)—Administradór munisípiu Viqueque, Januário Soares ‘Bolly’, hateten, alternativa ba komunidade Lacluta bainhira atu viajen bá Dili, bele liu fali Viqueque villa, tanba ponte Dilor daudaun ne’e kotu.

“Ha’u hanoin alternativu atu liu ponte Dilor ne’e, iha tempu rai udan mota tun komunidade hosi parte Lacluta liu fali hosi Viqueque Villa maka viajen bá Dili. Bainhira udan la tun, entaun komunidade bele liuhosi dalan ne’ebá, maibé tempu sira fila mai liuhosi Viqueque villa. Inspesaun Jestaun ekipamentu, Institutu Públiku (IGE, I.P, sigla portugés) atu mai aterru, maibé hanoin se aterru de’it la garante no mota tun sei sobu nafatin,” Administradór munisipál dehan ba Agência TATOLI, iha ninia knaar fatin, tersa ne’e.

Nia dehan, antes ne’e IGE, I.P atu mai buka solusaun aterru ponte Dilor, maibé ba futuru bainhira mota sa’e sei sobu, tanba ne’e solusaun ba ponte ne’e maka aumenta ai-rin hodi halo luan ponte.

“Solusaun aterru ne’e hanesan provizóriu, tanba ne’e presiza solusaun lalais. Antes ne’e ha’u fó hatene ona institutu, maibé to’o agora seidauk mai no sira dehan semana oin hela de’it maibé la mosu iha Viqueque,” nia akresenta.

Notísia relevante: Ekipa IGE, I.P sei normaliza ponte Dilor semana oin

Tuir nia, tanba kuaze tama ona iha dezembru, orsamentu tinan 2021 ba ponte laiha.

“Agora ita tama ona fulan dezembru orsamentu laiha, maibé Ministériu Obra Públika (MOP) bele prevee orsamentu ruma iha tinan 2022, nune’e bele hadi’a ponte hodi komunidade bele liu,” nia akresenta.

Antes ne’e, IGE, I.P iha ona planu, iha tempu badak, ekipa destakadu iha munsípiu sei tun normaliza ponte Dilor no Welolo iha postu Lacluta, munisípiu Viqueque.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here