Osan Dolar Amérika. Imajen/Espesiál

DILI, 30 novembru 2021 (TATOLI)—Core Group Transparency (CGT) tersa ne’e realiza media breafing ho media nasionál ho tema “Orsamentu Jerál Estadu (OJE) 2022 ne’ebé asesivel no inkluzivu ba ema ho defisiénsia”.

Koordenadór Core Group Transparency (CGT), Sabino Gusmão Fitun, hateten objetivu realiza media breafing ne’e atu hanoin no koko tuur hamutuk ho kolega média sira atu diskute konaba asuntu relasaun ho maluk defisiénsia sirania nesesidade liga ba orsamentu jerál Estadu 2022.

“Tanba, mídia hanesan pilar importante iha prosesu demokrásia no direitus humanus, tanba ne’e ohin ami halo diskusaun oinsa maka ba oin ita hamutuk atu luta no halo advokasia ba Governu no ukun na’in sira, liga ho orsamentu jerál Estadu, pelemenus tinan ne’e sira bele tau item sira liga ho ema defisiénsia ninia nesesidade,” Sabino Gusmão Fitun hateten ba jornalista sira iha nia knaarfatin, Caicoli, Díli, ohin.

Ezemplu, nia dehan, bainhira halo konstrusaun infraestrutura karik, pelumenus tau verba (item) balun halo trotoar ne’e tenke asesivel ba maluk defisiénsia sira ho kadeira roda, no halo uma karik pelumenus iha haris fatin ne’ebé asesivel no labele halo aas ka eskada labele naruk liu, maibé halo dezeña ida-ne’ebé asesivel ho ema defisiénsia sira.

“Ho ida-ne’e mak ohin ami konvida maluk mídia sira atu ita diskute no fó hanoin ba malu. Nune’e ba oin, ita bele luta no la’o hamutuk ba maluk defisiénsia sirania nesesidade,” nia dehan.

Tanba, durante CGT nia monitorizasaun tinan hira ba kotuk haree katak kada tinan Governu sempre kria orsamentu Estadu, maibé nia porsaun tau ba nesesidade maluk defisiénsia sirania minimu tebes.

“Hanesan itania infraestrutura, estrada, uma eskola, edifisiu públiku no merkadu barak mak la asesivel, hanesan laiha rampa no laiha trotoar ida-ne’ebé asesivel ba maluk defisiénsia sira,” nia dehan.

Ho ida ne’e, dadaun ne’e CGT haree hela asuntu balun liga ho Governu nia planu iha Ministériu lubuk ida mak hamutuk harii ona konaba planu asaun ba ema ho defisiénsia.

Maibé realidade iha Orsamentu Jerál Estadu 2022, miniestériu lubuk ida mak sira la tau espesifiku verba orsamentu iha ne’ebá, tanba ne’e fó hanoin ba sira bainhira debate orsamentu ne’e, ema ho defisiénsia sira hato’o sira-nia submisaun ba Governu no Parlamentu Nasionál atu haree no diskute didi’ak asuntu konabá ema ho defisiénsia nian.

Iha OJE 2021 ne’e, CGT haree Governu seidauk tau orsamentu no agora daudaun OJE 2022 atu debate haree asaun planu iha maibé la espesifiku.

“Hanesan, iha Ministériu Justisa karik, maluk defisiénsia sira ne’ebé hetan violasaun ruma ba iha ne’ebá, itania juis sira seidauk formandu iha braille ho jestu sira, ida-ne’e susar. Entaun, oinsá mak tau osan iha ne’ebá hodi fó formasaun ba juis sira atu oinsa bele komprende ba maluk defisiénsia sira ne’ebé la haree no la rona,” nia hateten.

Maibé, tuir nia, kona-ba ida-ne’e iha OJE 2022 Governu prevee orsamentu la espesifiku tau iha ne’ebá maibé jerál de’it. Ho ida ne’e mak husu ba mídia liu-liu jornalista sira, hamutuk hodi buka tuir tanbasá mak Governu la tau orsamentu ba ema ho defisiénsia sira tuir planu ne’ebé sira trasa,” nia dehan.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here