Prezidente Komisaun Asemblea Jerál ba Kongresu Nasioál, Aniceto Berlelo. Imajen/ Hortencio Sanhez

DILI, 29 novembru 2021 (TATOLI)– Prezidente Komisaun Asemblea Jerál ba Kongresu Nasioál, Aniceto Berlelo, informa, asembleia jeral ba kongresu deside ona kandidatura na’in rua mak prinxe rekezitu hodi kompete ba Prezidente Konfederasaun Desportiva Timor -Leste (CDTL-sigla Portugés) períodu 2022-2026.

“Hahú hosi outubru to’o novembru ne’e, ami fó sai iha kandidatura na’in tolu mak mai hatama sira nia dokumentu, maibé halo verifikasaun iha kandidatura rua de’it mak pasa atu kompete iha kongresu ne’ebé sei hala’o tempu besik,” Prezidente Komisaun Asemblea Jerál ne’e hateten ba Jornalista sira iha Jináziu Dili, segunda ne’e.

Kandidatura na’in rua ne’e, Afranio Xavier Amaral, asume hela kargu Prezidente ba Federasaun Atletizmu Timor-Leste (FATL) no Macario Sanches asume kargu Sekretáriu Jerál Federasaun Shorinji Kempo Timor-Leste (FSKTL),

Tuir oráriu kogresu nasionál hodi hili estrutura foun hala’o iha 20 novembru liubá, maibé tanba iha fallansu tékniku no laiha orsamentu.  Nune’e adia fali ba loron 11 dezembru.

“Ami agradese mós ba  Sekretáriu Estadu Juventude no Desportu bele tulun ona ami ho orsamentu hamutuk $1,600 atu ami realiza asemblea ne’e hodi hala’o kogresu,” Berlelo agradese.

Daudaun ne’e, komisaun seidauk hatene los fatin atu realiza kongresu ne’e tanba sei iha faze negosiasaun ho salaun balun iha Dili laran.

Enkuantu, kongresista sira ne’ebé iha direitu absoluta hodi partisipa iha kongresu  hodi ezerse direitu votu hili Prezidente ba lidera CDTL mak federasaun desportiva hamutuk 28 hanesan, FATL, Federasaun Taekwondo Timor -Leste (FTTL), Federasaun Shorinji Kempo Timor-Leste (FSKTL) no seluk tan.

CDTL lidera hela hosi Prezidente Afranio Xavier Amaral ne’ebé eleitu ba Prezidente iha 2016 liu ba to’o ohin loron, maibe Afranio nafatin iha kbiit atu kompete dala ida.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here