Matebian Djafar Bin Amude Alkatiri. imajen/ espesial

DILI, 29 novembru 2021 (TATOLI)—Konsellu Kombatente Libertasaun Nasionál (CCLN, siglá portugés), konsidera saudozu Djafar Bin Amude Alkatiri merese hetan kondekorasaun hosi Prezidente Repúblika iha ambitu komemorasaun loron proklamasaun independénsia 28 Novembru ba dala-46 (28 novembru 1975-28 novembru 2021) ne’ebé selebra iha Darsula, Gariuai, Baucau.

Notísia Relevante: Prezidente Repúblika sei kondekora sidadaun nasionál na’in-52

“Informasaun sira-ne’ebé espalla iha mídia sosiál ne’e la loos. Saudozu Djafar iha direitu no merese atu simu kondekorasaun, tanba nu’udar membru Comite Central Fretilin (CCF), ne’ebé partisipa mós iha organizasaun klandestina fó ona kontribuisaun ba iha luta libertasaun nasionál,” Prezidente Konsellu Kombatente Libertasaun Nasionál, Vidal de Jesus ‘Riak Leman’, hateten ba Agência TATOLI iha knar fatin, Caicoli, Dili, segunda ne’e.

Nia husu ba públiku atu labele fiar lia falsu ne’ebé espalla iha mídia sosiál katak Djafar Bin Amude Alkatiri durante ne’e la envolve an iha prosesu luta maibé simu de’it kondekorasaun.

Tuir prosesu, bainhira Prezidente Repúblika atu kondekora sidadaun ida konvida mós veteranu hosi sekretáriu komandante rejiaun sira hotu hodi rona no fó hanoin mak aprova.

“Foin daudaun sira na’in hirak ne’ebé simu kondekorasaun medalla iha Baucau ne’e, ami mak ba aprova iha Palásiu Prezidente Repúblika. Sira iha ne’ebá, konsellu ida bolu ami sekretáriu komandante rejiaun sira ba hotu hanesan Falur Rate Laek, Sabika hodi aprova sé-sé mak atu atu simu kondekorasaun ne’e,” Riak Leman hateten.

“Agora, kona-ba ita-nia irmaun Djafar, ida-ne’e ami koordena tiha ona atu nia bele simu medalla,” nia hateten.

Prezidente CCLN ne’e haktuir, bainhira iha 1996 nia-parte tun mai iha Dili ho orientasaun komandu FALINTIL nian, mezmu movimentu inimigu makaas tebes iha sidadae no momentu ne’e hasoru malu ho Djafar ho liurai Jacob Fernandes ko’alia kona-ba servisu klandestina nian.

Notísia Relevante: PR Lú-Olo: Xanana mak rekomenda ba ONU hakotu konflitu iha Timor-Leste 

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here