Kontrusaun Uma Kbiit Laek iha aldeia Noe-Ninen, suku Cunha. Imajen Tatoli/Abílio Elo Nini.

OÉ-CUSSE, 26 novembru 2021 (TATOLI) – Progresu kontrusaun ba Uma Kbiit Laek (UKL) iha aldeia Noeninen, suku Cunha, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA) atinje ona 68%.

“Iha suku Cunha, iha unidade rua iha aldeia Noeninen ida atinje ona 68,84% no ida fali atinje ona 56,44%, dapur mak seidauk, hein de’it kalen atu taka, tanba tuir dezeñu kalen tenke modelu 4,2, tanba ne’e mak ita sei buka iha nasionál mós seidauk iha, ne’ebé iha tempu badak ita sei kompleta 100% hodi entrega ba Governu,” Vise-Diretór PNDS iha RAEOA, João Bobo, informa ba Agência Tatoli iha Palaban, Oé-Cusse, sesta ne’e.

Nia fó sai katak, totál orsamentu ba uma unidade rua ne’e kada uma hetan rihun $17 hosi rihun $34, daudaun ne’e prosesu orsamentu tarde, nune’e halo de’it pagamentu insentivu ba traballadór, kada uma hetan rihun $1.

Purtantu totál benefisiáriu Uma Kbiit Laek iha RAEOA hamutuk 36, ne’ebé lokaliza iha suku 18, kada aldeia hetan uma rua, nune’e ba prosesu konstrusaun ba uma 34 seluk iha suku 17 seidauk realiza tanba sei prosesa hela iha unidade aprovizionamentu hodi halo kuotasaun.

Enkuantu daudaun ne’e iha RAEOA foin hahú uma rua iha aldeia Noeninen, suku Cunha, sub-rejiaun Pante Makassar.

Nune’e benefisiáriu Uma Kbiit La’ek, Berta Quefi hosi aldeia Noeninen, agradese ba Governu, tanba apoia ona uma ba família kbiit laek.

“Ha’u kontente, maske uma seidauk remata, ha’u fó obrigadu ba nai-ulun sira tanba iha tinan ne’e tau matan mai ami hanesan família kbiit la’ek iha ita-nia rai,” nia orgullu.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here