Funsionáriu feto hosi liña ministeriál munisípiu Viqueque partisipa formasaun iha salaun Administrasaun munisipál, segunda (28/11). Imajen TATOLI/Vitorino Lopes da Costa

VIQUEQUE, 29 novembru 2021 (TATOLI)–Ministériu Finansa (MF) liuhusi Diresaun Jerál Estatístika (DGE, sigla portugés), kapasita funsionáriu feto hosi liña ministeriál iha Viqueque kona-ba rekolla dadus violénsia bazeia ba jéneru, nune’e bele halibur dadus ho kualidade.

Formasaun ne’e partisipa hosi formandu na’in-25 durante loron-lima, hahú loron 29 novembru to’o 03 dezembru.

“Inisiativa ne’e bele haforsa polítika Governu atu hapara aktu violénsia bazeia ba jéneru tanba bainhira ita ko’alia kona-ba kapasitasaun, iha feto no grupu feto barak iha munisípiu mak presiza apreende halibur dadus ne’ebé ho kualidade,” Xefe Departementu Estatístika, informa iha salaun Administrasaun munisipál, segunda ne’e.

Objetivu atividade atu hatene di’ak liu produsaun dadus liña ministeriál no organizasaun sosiedade sivil sira iha munisípiu Viqueque hodi hetan dadus akuradu.

Iha biban hanesan, Diretór Nasionál Metodolojia no Rekolla Dadus hosi DGE, Ricardo da Cruz Santos, hateten, programa kapasitasaun nu’udar spotlight, ne’ebé implementa hosi parseiru hanesan UN Woman, United Nations Development Programme (UNDP), United Nations Children’s Fund (UNICEF) inklui organizasaun seluk ne’ebé iha kompromisu atu halakon violénsia kontra feto no labarik feto.

“Diresaun Estatístika hanesan intituisaun Estadu ne’ebé responsável ba servisu dadus tanba mai ho funsaun atu kolleta no disamina dadus. Entaun liga ba dadus violénsia bazeia ba jéneru, daudaun ne’e ita presiza serbisu maka’as hodi hetan dadus. Tanba ne’e, ami serbisu hamutuk ho parseiru sira hodi fó formasaun ba feto hosi liña ministeriál sira iha Viqueque,” nia esplika.

Iha fatin hanesan, Administradór munisípiu Viqueque, Januário Soares ‘Bolly’, konsidera formasaun ne’e importante tebes tanba bele ajuda funsionáriu sira bele rekola dadus ho loloos.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here