Billete Identidade. Imajen Tatoli.

DILI, 29 novembru 2021 (TATOLI)— Diretór Jerál Diresaun Nasionál Servisu Rejistu no Notariadu (DNSRN) iha Ministériu Justisa (MJ), Crisogno da Costa Neto, informa, DNSRN la fó Billete Identidade (BI) orijinál ba sidadaun sira ne’ebé trata dokumnetu ne’e tanba laiha tinta atu halo impreme.

“Atendimentu ba Billete Identidade iha nasionál, dala-ruma, ami fó BI provizóriu no labele fó orijinál tanba tinta hotu,” Diretór Jerál DNSRN ne’e hateten ba Agência TATOLI iha kna’ar fatin Colmera, segunda ne’e.

Daudaun ne’e, MJ liuhosi DNSRN, loke ona konkursu no empreza manán na’in mak Lolina Unipesoal, Lda, halo ona akizasaun ba materia tinta produsaun BI nian.

“Sasan sira kompañia hatama mai ona, maibé hein aprovizionamentu esplika ba kompañia atu hahú halo distribuisaun ba munisípiu Dili no munispiu sira seluk, nune’e ita bele halo atendimentu imprime BI orijinál ba sidadaun,” Crisogno da Costa afirma.

Tanba, mákina imprime BI iha munisípiu Lautém, Baucau, Manatuto, Ermera no Maliana, mak daudaun avaria hela.

“Ami nia aprovizionamentu DNSN loke ona konkursu, maibé seidauk iha kompañia ida maka hakarak konkorre,” nia akresenta.

Enkuantu kona-ba servisu atendimentu pasaporte kontinua la’o normál tanba kaderneta pasaporte sei sufisiente.

“Kaderneta pasaporte ami sei iha 50.000-resin ne’ebé sufisiente ba tinan rua hodi la halo akizasaun,” nia garante.

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here