Polisia Tránzitu sukat hela fatin asidente tráfegu ne’ebé rezulta aman ho oan mate iha área Kampu Alor, Dili,. Imajen/Dok.PNTL

DILI, 29 novembru 2021 (TATOLI)— Xefe Departamentu Tránzitu no Seguransa Rodaviáriu Nasionál, Superintendente Polisia João Belo dos Reis, informa, durante fulan-novembru ne’e, PNTL rejista asidente tráfegu hamutuk 38, hosi númeru ne’e na’in-rua mate.

“Fulan ne’e, ami rejista kazu asidente tráfegu hamutuk 38, hosi númeru ne’e nain-rua mak lakon vida, na’in-neen kanek todan no 30 kanek kaman,” Superientidente Polisia João Belo, hateten ba jornalista sira iha Kuatel PNTL, Caicoli, segunda ne’e.

PNTL mos indetifika ema hirak ne’ebé mate ko kazu asidente tráfegu maioria joven ho idade 25 mai kraik ho 90% no idade avansadu 10% ne’ebé lori motorizada la uza kapasete, lanu no laiha karta kondusaun. Enkuantu tipu trasporte ne’ebé barak liu hetan asidente mak motór mio beat.

“Ha’u husu ba inan-aman sira atu labele fó motór ba oan sira idade 17 ba kraik, atu kondus karreta ka motór bainhira karta kondusaun seidauk iha,” João Belo fó hanoin.

Atu prevene risku asidente tráfegu ne’e, PNTL sei la tolera sira ne’ebé lori motór la uza kapasete no laiha karta kondusaun

Komandu mós fó instrusaun ba Polísia Tránzitu iha Dili no Munisípiu sira kontinua asume responsabilidade atu mantein lei no orden hodi halo pasa revista ba transporte públiku hanesan motór no karreta liuliu verifika karta kondisaun, karta inspensauun no dokumentu transporte nian.

“Ami kontinua halo pasa revista mak deteta laiha karta kondisaun ami halo apresaun tanba nia seidauk hatene regra oinsá atu lori viatura no ami sei aplika  koima tuir tipu infrasaun ne’ebé maka nia viola,” nia akresenta.

Rekolla reseita $8.832

Entretantu, Xefe Departementu Tránzitu no Seguransa Rodaviáriu Nasionál, Superintendente Polísia João Belo dos Reis, informa, Unidade Tránzitu no Seguransa Roduviariu ne’ebé koloka iha fronteira Batugade no Mota-Masin konsege rekolla reseita ba kofre Estadu hamutuk $8.832.

“Tránzitu nasionál destaka iha froteira rua iha Mota-Masin Salele no Mota-Ain Batugade, iha fulan ne’e, hatama osan ba kofre Estadu $8.832,” Superintendente Polisia João Belo, hateten ba jornalista sira iha Kuatél Jerál PNTL, Caicoli, segunda ne’e.

Reseita hirak ne’e, undiade tránzitu rekolla hosi karreta sira ne’ebé mai hosi nasaun viziñu Indonézia  mai iha territóriu nasionál, maibe laiha dokumentu no selu koima.

Notísia Relevante: Asidente tráfegu hamate ema na’in-12 iha janeiru to’o outubru

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here