Diretór Servisu Munisipál Edukasaun Baucau, Augusto Hornai Ximenes. Imajen Tatoli/Natalino Belo.

BAUCAU, 29 novembru 2021 (TATOLI) – Servisu Munisipál Edukasaun Baucau fósa-katak, totál eskola hamutuk 188 iha munisípiu Baucau komposta hosi ensinu báziku to’o sekundária jerál presiza konstrusaun foun tanba kondisaun la permite.

Diretór Servisu Munisípal Edukasaun Baucau, Augusto Hornai Ximenes, esplika, totál eskola 240 iha Baucau hosi totál 451 edifísiu eskola no eskola ne’ebé kondisaun di’ak hamutuk 201.

Hosi nune’e eskola ne’e, edifísiu eskola hamutuk 62 presiza reabilita tanba kondisaun grave no konstrusaun foun hamutuk 188.

“188 edifísiu ne’e presiza konstrusaun foun tanba nesesidade hanesan sala aula, laboratóriu no biblioteka laiha,” Diretór Augusto Hornai Ximenes, ko’alia iha nia kna’ar-fatin, Vila Nova, segunda ne’e.

Kada tinan SMEB kontinua submete planu ba Ministériu Edukasaun, Juventude no Desportu (MEJD) inklui liuhosi Programa Dezenvolvementu Intergradu Munisip’al (PDIM) nune’e tinan 2021 mak ministériu aprova 30 projetu.

Projetu 30 ne’e inplementa liuhosi Programa Konstrusaun no Reabilitasaun Infraestrutura Edukativa (PKRIE) ne’ebé MEJD aloka iha Orsamentu Jerál Estadu tinan fiskál 2021.

Parte edukasaun realiza ona formasaun grupu komunitária hamutuk 30 no submete ona ba MEJD no hetan ona aprovasaun inklui asina ona kontratu atu inplementa projeitu refere.

Tuir planu, loron 01 dezembru sei realiza enkontru atu orienta grupu sira atualiza orsamentu iha Banku Nasionál Komérsiu Timor-Leste (BNCTL, sigla Portugés) no hahú implentasaun obra refere hafoin lansamentu.

“Ami sei enkontru ho sira bazea ba informasaun verbál hosi diresaun nasionál dezenvolvementu parke eskolár MEJD nian katak orsamentu aloka ona ba grupu komunitária nia konta bankária,” Augosto esplika.

Tuir livru matadalan, projetu refere tenke implenta tuir kalendáriu ne’ebé mak sei hahú iha dezembru no fulan-abrál no maiu 2022 mak termina.

Enkuantu servisu edukasaun munisipál iha obrigasaun mós atu akonpanã liuhosi pesoál tékniku karik iha problema ruma buka solusiona to’o projetu ne’e termina tuir tempu.

“Ita sei iha eskola lubuk ida ne’ebé presiza reabilita no konstrusaun, la’ós responde hotu maibé liuhosi projetu refere hamenus ona preokupasaun,” Augosto hateten.

Projetu refere, eskola ida minimu sala aula rua no másimu neen ne’ebé totál aula hamutuk 98 iha postu administrativu Baguia, Laga, Quelicai, Venilale no Baucau Vila.

Eskola ne’ebé mak sei implementa projetu hanesan ensinu sekundária públika filiál Baguia konstrusaun sala tolu inklui toilet no sala profesór, EBF Ossolia, Quelicai konstrusaun sala tolu no toilet, EBF Darlai, Laisoru-lai, Quelicai konstrusaun sala tolu no toilet.

Ensinu sekundaria númeru 1 Baucau Vila konstrusaun sala tolu no laboratóriu, Ensinu Báziku Sentrál Lawateri konstrusaun sala tolu no sala profesór, EBC Ossohuna reabilitasaun sala neen, EBF Uakala konstrusaun sala tolu, pre-eskolár amizade Venilale konstrusaun sala rua, toilet, kuzina no armazein.

Nune’e mós eskola ne’ebé mak sei implementa projetu hanesan ensinu sekundária públika filiál Baguia konstrusaun sala tolu inklui toilet no sala profesór, EBF Ossolia, Quelicai konstrusaun sala tolu no toilet, EBF Darlai, Laisoru-lai, Quelicai konstrusaun sala tolu no toilet.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here