Komunidade hamoos baleta tuir programa Mão de Obra. Imajen Tatoli/Celestina Teles

COVALIMA, 29 novembr 2021 (TATOLI)—Administradór Postu Administrativu Suai Vila, Luzinho do Rego, informa dezenvolvimentu iha Covalima la’o ladún másimu tanba impaktu hosi impase politika no pandemia COVID-19.

“Progresu dezenvolvimentu iha Covalima la’o ladún másimu tanba kauza hosi impase polítika no pandemia COVID-19. Maibé, ba oin ita espera katak ita-nia progresu dezenvolvimentu sei la’o di’ak liután,” Luzinho do Rego hateten ba Agência Tatoli iha nia knar fatin, segunda ne’e. 

Nia hatutan, progresu dezenvolvimentu iha área infraestrutura bázika hanesan bee-moos, edukasaun no setór saúde presiza kontinua atu hadi’a. 

“Atu hadi’a setor hirak ne’e, hanesan autoridade lokál ami rekomenda ba líder Nasionàl sira atu iha konsensu nasionál, nune’e dezenvolvimentu iha Timor-Leste ne’e bele la’o di’ak liután,” nia hateten. 

Tuir nia pbservasaun. maske dezenvolvimentu iha Covalima la’o ona maibe ladún másimu entaun ba oin presiza atu hadi’a nafatin.

Veteranu Covalima, Agustinho Mendonça ‘Raan Nakali’ nia observasaun katak dezenvolvimentu ba veteranu sira laiha mudansa, tanba konsege forma estrutura iha munisípiu no sede konsellu veteranu munisípiu nian.

Aleinde ne’e, nia dehan, maske durante ne’e Timor-Leste hasoru difikuldade tanba situasaun pandemia COVID-19, maibé veteranu sira involve an iha kampaña nasionál vasinasaun no halo sensibilizasaun kona-ba COVID-19 ba komunidade atu simu vasina iha sentru vasinasaun sira.

Ami nafatin la’o, ba povu sai moris di’ak. Ami atu liberta ita-nia povu no nasaun hotu ona, agora atu liberta ita-nia povu—ami tenke kontinua la’o ba povu nia moris di’ak,” nia dehan.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here